Shillong, Nohprah 01
U MLA ka North-Shillong Konstitwensi, u Bah Adelbert Nongrum u la ong ba ïa mynta hi u dangdei beit u MLA ka Voice of the People Party (VPP) namar wat u Lamphang ruh u dangñiew kumta.
“Ngam pat kwah ban pynïasoh bad kiwei pat ki seng saiñ pyrthei hynrei mynta nga dangdei beit u dkhot ba pura jong ka Voice of the People Party (VPP),” la ong u Bah Adelbert haba ïakren bad ki lad pathai khubor ha ka sngi Nyngkong jong ka taïew.
U Bah Adelbert Nongrum u la ong “Ngam kheiñ ïa ka jingsospon ka VPP ïa nga kum u MLA, namar ba ka jingsospon jong ka VPP kam long kaba shai”.
U la ong ruh ba um sngew ïalade ba u dei u MLA ba la shah sospon namar wat u Lamphang ka Ïingdorbar Thawaiñ ruh u dangñiew ïa u kum u dkhot bapura jong ka VPP.
Haba kylli, u Bah Adelbert u la ong ba u la don ka jingthmu ban leit sha Ïingbishar ban pan jingshai ha kaba ïadei bad ka shithi shah sospon, hynrei u la ong ba un sa rai ïa kane, la un leit ne-em sha Ïingbishar.
Kumta u Bah Adelbert u la pynpaw ba um pdiang satia ïa ka jingrai jong ka party, da kaba ong ruh “Ka la don ka jingartatien kaba khraw halor ka rukom ba ka ‘party leadership’ ka pynsospon ïa nga”.
“Balei ki shim ïa kane ka rai khlem da ai lad ïa nga ban kren. Ki dei ban khot ïa nga shwa ban ïa kren bad shwa ba kin shim ïa kane ka rai ban sospon,” u la bynrap.
Haba ïa dei pat bad ki khana lamler kiba la shah kynnoh ba un sa leit pynïasoh noh bad kiwei ki sengsaiñ pyrthei ka Jylla, u Bah Adelbert u la ong ba kum kine ki jinglamler kim dei kiba thymmai bad um sngewphylla shuh.
“Nga kynmaw ruh ba kum kine ki jingkynnoh ki mih ha ka por ba u nongïalam barim ka KHNAM, u Bah Paul Lyngdoh u la iehnoh ïa ka seng,” la bynrap shuh-shuh u Bah Adelbert.
