Shillong, Nohprah 01
Ka Hynñiewtrep Integra-ted Territorial Organi-sation ha ka 01 tarik u Nohprah 2025, ki la phah da ka jingthoh sha u Myntri ka tnad Environ-ment Forest and Climate Change ka Sorkar Pdeng, u Bhupender Yadav lyngba u Deputy Director General Forest, ban pynpaw ïa ka jingpyrshah jur ïa ka jingthmu pynlong ïa ka ‘Public Hearing’ ha ka shnong Daistong.
Ka jingthmu ban pynlong ïa ka ‘Public Hearing’ ka dei ha ka 19 tarik u Nohprah 2025, ha ka shnong Daistong East Jaiñtia Hills District (EJHD), na ka bynta ka jingthmu shna karkhana dewbilat da ka Shree Cement Limited ha katei ka shnong.
Haba kren sha ki lad pathai khubor, u Bah Donbok Dkhar, President rangbah ka HITO u la ong, ba ka seng ka pynpaw ïa ka jingpyrshah jur halor kane ka jingthmu shna karkhana biang ha katei ka thaiñ.
U la ong ba kane ka jaka ba thmu shna ïa ka karkhana ka don hajan bad ka shnong. Kumta ka seng ka pyrshah namar ka jingdon ki karkhana ka pynjot ïa ka mariang bad ka pynjaboh ïa ka lyer da kaba ai nuksa ïa ka jingjaboh ka lyer ha Nongbah Delhi.
U la ong ruh ba kane ka jingai jingbit ïa katei ka kompani ka dei lyngba ka Single Window Agency, kaba la khlieh da u Myntri Rangbah ka Jylla, u Conrad K Sangma.
“Wat lada la bthah ïa kane na Delhi, hynrei ka Jylla ka don la ka bor ba la ai kyrpang namar ka dei ka jaka, ka khyndew ka shyiap jong ngi, ym ba u nongwei nongar un wan batai stad,” la bynrap u Bah Donbok.
Nalor kata, u la ong ba ka seng kan iai don ryngkat bad ka shnong Daistong, ban nym ailad ban wan tei karkhana ha katei ka shnong, da kaba byrngem ruh ba ka seng kan sa pynlong da ka jingïakhih lada ka Sorkar kmie ne ka Sorkar Jylla, kim pynsangeh ïa kane ka jingthmu.
