Shillong, Nohprah 02
U Myntri Rangbah ka Jylla, u Conrad K. Sangma u la kyntait ïa ki jingkynnoh jong ka Congress ba ka Sorkar Jylla ka ïalam ïa ka Jylla sha ka jingdap ram, da kaba ong ba ki jingkynnoh jong ka seng ki long ki bym don nongrim bad kiba ïalam bakla.
“Nga la batai bunsien ïa kane. Nga la pyni ïa ka jingroi jong ka Jylla,” la ong u Conrad da kaba ban jur ba ka jingshim ram jong ka Jylla ka long hapoh u pud ba la buh da ka Sorkar Pdeng bad ka RBI.
U Conrad u la pynshai ruh ba ki ram na ka World Bank bad ka ADB ki long ha ka jingïa bynta kaba 90:10 lane 80:20, ha kaba ka Sorkar Pdeng ka khmih ïa ka bynta kaba kongsan.
“72% la siew biang da ka Sorkar Pdeng, 28% la siew biang da ka Sorkar Jylla. Kumta, ka jingkylli ba kane ka dei kaba la bei tyngka lyngba ka ram kam mih satia,” u la ong da kaba bynrap ba ka Congress ka pynsaphriang ïa ki jingtip ba bakla sha ki paidbah.
Na ka liang u Myntri Rangbah u la kyrpad ïa ka Congress ba kan sngewthuh bha shaphang ka pisa jong ka Jylla hashuwa ban kren eiei, da kaba ong ba ki jingpyrshang jong ki ban kynthoh ïa ka khana pynroi jong ka Sorkar ki long ki bym don jingmut.
“Kumta, u President ka MPCC u pyrshang ban ïalam bakla ïa ki paidbah kaba long kaba sngewsih shi kat dei. Ki ïohi ïa ka jingkiew bad kim lap ïa kano-kano ka lynti ban kynthoh pyrshah ïa kane ka jingkiew kaba dang jia mynta bad kumta ki ïalam bakla ïa ki paidbah kaba long kaba sngewsih haduh katta-katta bad ngan kyrpad ba ki dei ban sngewthuh bha ïa ka pisa-tyngka hashuwa ba kin kren eiei,” u la ong.
