Shillong, Nohprah 11
Ki nongtrei Asha jong ka Jylla kiba hapoh ka shatri ka Meghalaya Asha Workers Union (MAW-U) ki la byrngem ban sdang ïa ka jingïakhih da kaba sangeh treikam, lada ka Sorkar Jylla kam pyllait ïa ka bainong trei jong ki.
Ïa kane ka rai la shim ha ka jingïalang ba la long ha ka Sngi Palei ha Dorbar Hall Pynthorbah Golflink Shillong ban ïakren halor ka jingslem ban pyllait ïa ka bainong trei jong ki.
Haba kren sha ki lad pathai khubor ka President jong ka MAWU ka Kong Mira June Marsing ka la ong ba ki nongtrei Asha jong ka Jylla kin ap haduh 19 tarik Nohprah ba ka Sorkar Jylla ka dei ban pyllait ïa ka bainong jong ki.
Ka Kong Mira ka la ong ba ki nongtrei Asha ha Ri-lum Khasi-Jaiñtia kim pat ïoh ka bainong kaba dei ka bhah na ka Sorkar Pdeng naduh u bnai Jymmang, katba ki nongtrei Asha ha Ri-lum Garo kim ïoh bainong mynta la shi snem tam.
Nalor kata ka la kubur ba ka Sorkar Jylla ka pyllait hok ïa ka bainong jong ki nongtrei Asha hynrei kaba sahkut mynta ka dei ka bhah ba wan na ka Sorkar Pdeng.
“Ha ka jingshisha ngi la ai por haduh 15 tarik Naiwieng 2025 ïa u Mission Director ka National Health Mission ban pyllait noh ïa ka bainong hynrei u Director u la pan por bad mynta ngi la rai ban ap tang haduh 19 tarik Nohprah ban pyllait ïa ka pisa bad lada ka Sorkar kam lah ban leh eiei, ngim banse ban ïakhih da kaba sangeh treikam noh naduh 19 tarik Nohprah 2025” la ong ka Kong Mira.
Ka la ban jur ba ka ka Sorkar ka dei ban pyllait noh ïa ka bainong jong ki lym kumta ka jingïakhih jong ki ban sangeh treikam kan ïai-bteng tad haduh ba ki la ïoh lut ïa ka bainong jong ki.
