Shillong, Nohprah 11
U MLA ka North Shillong u Bah Adelbert Nongrum ha ka sngi Palei u la pynpaw ka jinglyngngoh ïa ka jingpynlip bording khah-khah hapoh ka konstitwensi jong u kaba la buh jingeh ïa ki ïing ki sem ha ki bynta baroh.
Haba kren sha ki nongthoh khubor u Bah Adelbert u la buh jingkylli ïa ka jingpynlip bording kaba la pynthut ïa ka imlang ka sahlang. U la ong ba, ka jingpynlip bording khari-khari bad teng-teng kaba neh baroh shi sngi, kumjuh kaba ju jia ruh ha ka por mynmiet, ka la ktah jur ïa baroh khamtam ïa ki khynnah skul kiba dang don hapdeng ka jingpynkhreh ïa ka jingthoh eksamin.
U Bah Adelbert u la ïathuh ba, haba ïadei bad kane ka bynta u la phone ïa u Myntri ba dei peit ïa ka tnad bording u Bah Metbah Lyngdoh bad phah ruh da ka jingthoh lyngba ka ’email’ ban kyntu ïa ka tnad lyngba ki ophisar bad kiba trei ba kin leh ïa kaba donkam.
Shuh-shuh u la ong, kum ki nongshong shnong ki don ka hok ban kylli namar ki la siew hok ïa ka khajna kaba ki dei ban siew. Namar kata u la buh jingkylli da kaba ong, hato kane ka jingpynlip light ka dei tang ha ka konstitwensi jong u ne baroh kawei ka Jylla, lada ka dei tang ha ka konstitwensi jong u balei bad kaei ka daw ba ki pynlip bording? kiba dei peit ki dei ban shim ïa ka jingkitkhlieh bad ki dei ban leh ïa kaba donkam.
U Bah Adelbert u la kyntu ïa ka tnad ban peit bad pynbiang mardor namar um kwah ba ki paidbah kin mad ïa ka jingeh, kiba dei khmih ki dei ban shim ïa ka jingkitkhlieh la ki dei kiba don ha ka shuki ruh. U la kyntu ïa u Myntri ka tnad bording ban peit ïa kane ka jingeh kaba ki paidbah ki mad.
