Shillong, Nohprah 11
Ka Dorbar Shnong Laban ka pyntip ba ha ka 18 tarik Nohprah 2025 (Sngi Palei), kan pynlong ïa ka jingpynkhuid shnong naduh ka por 8.00 baje mynstep haduh ka por 12.00 mynsngi, kumta ka kyrpad ïa ki nongshong shnong ban ïamih ryntih ha katei ka sngi.
Ka Dorbar Shnong Lumkshaid, Shillong, ha ryngkat ka jingïatreilang bad ka Shillong Municipal Board ka pyntip ba kan pynlong ïa ka jingpynkhuid Shnong ha ka 18 tarik Nohprah 2025 (Sngi Palei), naduh ka por 8:00 baje mynstep. Kumta la kyntu ïa baroh ki nongshong Shnong ban mih ryntih baroh kumjuh ruh ïa ki trai ïing ne trai jaka kiba sah shabar Shnong ban ïasnohktilang ha kane ka jingpynkhuid Shnong.
Ka Dorbar Shnong Qualapatty ryngkat ka Qualapatty Sports Social and Cultural Club ka pyntip ba kan pynlong ïa ka jingpynkhuid shnong ha ka 13 tarik Nohprah 2025 (Sngi Saitjaiñ) naduh ka por 8.00 baje mynstep. Kumta la kyrpad ïa baroh ki nongshong shnong ban mih ryntih, kumjuh ruh ki dukan kiba don hapoh u pud ka Dorbar Shnong ba kin khang bad ban shimbynta lang ha ka jingpynkhuid bad yn ym shah ïa ki kali kiba nabar shnong ba kin rung shapoh Shnong ha katei ka sngi katba ym pat dep ka jingpynkhuid shnong. Kumta la kyrpad ïa ki nongshong shnong bad ki nongñiah kali ban ïaishah lem.
Ka Shnong Mawlai Nonglum Durbar ka la pynbeit ban pynlong ïa ka jingpynkhuid shnong ha ka 16 tarik mynta u bnai. Ka jingpynkhuid shnong kan sdang naduh ka por 8 baje mynstep.
Kumta la kyntu ïa baroh ki kali kiba ïaid na ka Archbishop Dominic Jala Road (Long Round Road) Mawlai Nonglum ba kin ñiah suki bad don akor khnang ban lait na kino-kino ki jingjia ba sngewsih.
Ha kajuh ka por la kyntu ruh ïa baroh ki kali kit ñiut bad kumjuh ruh ïa ki kali kit skum kiba ïaid manla ka sngi lyngba jong ka Archbishop Dominic Jala Road (Long Round Road) Mawlai Nonglum ba kin da tap bha ïa ki kali khnang ba ki ñiut ki ñier bad skum kin ym hap ha ki surok.
La bthah ruh ïa ki trai jaka kiba don ïing, jaka hapoh u pud u sam jong ka Mawlai Nonglum ba kin wan ban pynkhuid ïa la ki jaka ha katei ka sngi bad kumjuh ruh ban ïakynduh ïa ki Rangbah Dong jong kato ka Dong.
