Shillong, Nohprah 11
U Samla Lambokstarwell Marngar, President ka Khasi Student’s Union (KSU) Sengkmie u la ong ba lada ka Sorkar ka thmu ban leh da ka bor ban pynpoi lynti rel hapoh ka Bri u Hynñiewtrep, ka dei ban sngewthuh ïa kaei ka ban sa jia ha kata ka por.
U la ong ba ka daw ba ka KSU ka pyrshah jur ïa ka jingwanrah lynti rel kadei namar ba ki la ïohi ha kiwei ki Jylla ba ka jingpoi ka lynti rel ka wanrah ka jingwan buhai shnong ki briew kiba nabar.
“Ki nongthawaiñ ha ka Jylla kim dei ban khohreh ïa kata ka jingwanrah lynti rel hynrei ki dei ban kren shwa ïa ki mat kiba ai jingïada ïa ka Jylla,” u la ong.
U Samla Lambokstarwell u la ong ruh ba wat mynta ki briew kiba nabar ki ïoh rung laitlan ha ka Jylla bad ki ïoh ïa ka syrnot bad ïoh ban thep vote ha ka Jylla. Kumta u la kyntu ïa ka Sorkar ban ïakren shwa ïa kita ki lad jingïada na ka bynta ka Jylla, hynrei ïa kita ki mat ban wanrah lynti rel yn sa ïa kren hadien la ki pdiang ne kim pdiang.
“Ka Jylla jong ngi ka dei ka Jylla kaba la long laitlan lypa bad ka bym don ruh ïa kita ki aiñ ban ïada bad lada kan wan sa kata ka lynti rel ka jingma kaba khraw kan sa ap ïa ka jaitbynriew jong ngi,” la ong u Samla Lambokstarwell.
U la pynkynmaw ruh ba ha u snem 2017 ka la don ka jingpyrshang ban pynpoi ha byrni hynrei ka la mih ka jingïakhih kaba jur bha, ha kaba bun ki samla ka KSU ki la rung sha along. “Lada ka Sorkar kam sngap ïa ki nongrim jong ka KSU, kan sa sngewthuh hi ïa kaei ka ban sa jia,” la bynrap u Samla Lambokstarwell.
“Ngi la ïohi ba bun ki nongmihkhmat kiba ju kren na ka por sha kapor da kaba thrang ban pynpoi ïa ka lynti rel hynrei to kren ïa kita ki mat bad ki aiñ ki ban ïada khnang ban shong shngaiñ ki briew ha ka Jylla,” la bynrap shuh shuh u Samla Lambokstarwell.
