Shillong, Nohprah 11
U Myntri Rangbah ka Jylla u Conrad K Sangma ha ka 11 tarik Nohprah u la plie ïa ka kor Solar Panel ba la pyndait lyngba ka jingkyrshan na ka CM Solar Mission ha ka ophis treikam ka Meghalaya State Pollution Control Board (MSPCB) Shillong.
Haba kren sha ki lad pathai khubor, u Conrad u la ong “Ngi kwah ban pynthikna ba baroh ki ophis Sorkar, ki ïing, ki skul bad ki jaka sumar kin pyndonkam noh ïa ka bording kaba khuid lane ka bording ba ïoh na ka sngi lyngba ki Solar Panel”.
Ka CM Solar Mission ka dei ka jingthmu ban pynbiang bording ba khuid ba pyndonkam da ka sngi kynthup ka jingpynbiang ïa ki Solar Panel, ki Inverter bad ki Battery, ban kynshew ïa ka bording na ka bynta ban pyndonkam katkum ka jingdonkam.
U Conrad u la pynpaw ïa ka jingsngewkmen ba ka ophis MSPCB Shillong ka la sdang ïa kane ka projek, ha kaba u la ïoh ban plie paidbah ïa kane ka projek ha kane ka sngi bad pynpaw ba u kyrmen ba kane kan kyrshan ïa ka jingdonkam bording ha katei ka ophis.
U la ïaroh ruh ïa ka MSPCB kaba la ïalam nuksa ïa ki paidbah, u la ong, “Kaba kham kongsan ka long ba kan phah ïa ka khubor ba bha ba ka ophis MSPCB ka ïalam nuksa ban pynthikna ba ka jingpyndonkam ïa ka bording kaba khuid bad ban pynshlur ïa kiwei ban leh kumjuh”.
