Jowai, Nohprah 11
Ki pulit ka West Jaiñtia Hills ki la kem noh ïa uwei u nong Ghana uba kyrteng u William Addo Agyei, 35 snem ka rta namar ka jingpyndonkam pynithuh ïa lade da ki kot ki sla ba shu thok.
U Superintendent of Police ka District u Jagpal Singh u la ong ba une u briew ha kaba nyngkong u la kam ba u kyrteng u Stanley Obayendo, hynrei hadien ba la pynlong biang ïa ka jingtohkit u la phla ïa ka kyrteng ba shisha jong u.
U Agyei uba dei na Kumasi Accra jong ka ri Ghana u la wan rung sha India da ka medical visa ha u bnai Jylliew 2025, bad kaba la kut noh hadien lai bnai. Wat hadien ba u la aplai ban pynjlan ïa ka visa hynrei um shym la ïoh jubab na ka tnad Foreigners Regional Registration Office (FRRO).
U la ong ba dang shen une u briew u la ïoh pdiang ïa ka email na ka FRRO kaba la bthah ïa u ba un wan pyntip sha ka ophis jong ki lane sha Banaswadi Police Station ha Bengaluru, Karnataka.
Da kaba kyntait ban leh ïa kane, u la pan jingïarap na uwei u nongïalam lynti uba la tip kyrteng kum u Frank uba la pynbeit ban pynpoi ïa u shapoh Bangladesh lyngba ka Meghalaya. Hynrei u la shah bat noh ha ki nongshong shnong bad hadien la kem noh da ki pulit.
Ki pulit ki la register case pyrshah ïa u Agyei namar ka jingpyndonkam da ki kot ki sla ba shu thok.
