Shillong, Nohprah 11
Ki paidbah nongshong shnong ka shnong Mustoh Elaka Shella ki la wan tur ha ophis Khasi Hills Autonomous District Council (KHADC) ban pan jingpynshai bad pynpaw ïa ka jingpyrshah ïa ka jingpynsangeh ïa ka jingjied ïa u rangbah shnong ba thymmai kaba dei ban long ha ka 12 tarik u Nohprah 2025.
Haba ïakren sha ki nongthoh khubor u Secretary jong ka shnong Mustoh u Bah David Rapmai u la ïathuh ba ka shnong ka sngew pyrshah ïa ka jingwan tuklar jong u Wahadadar ka Elaka Shella ban pynsangeh ïa ka jingpynlong ilekshon ban jied rangbah shnong.
U Bah David u la ong ka jingtur jong ki sha KHADC ka dei ban pan jingshai na kaei ka daw la pynsangeh ïa ka jingjied rangbah shnong bad kum ka shnong ka sngewlyngngoh ïa ka jingwan tuklar jong u Wahadadar bad ka District Council namar ka shnong ka don ïa ka riti ka dustur haba ïadei ka jingjied ïa ki nongïalam shnong bad ka bud ruh ïa ka riti dustur kaba dei ba la ju leh.
U la ïathuh ba hadien ka jingwan tur jong ki ha KHADC ki la ïoh ban ïakynduh ïa u Bah Winston Tony Lyngdoh Chief Excutive Member (CEM) ban pan bor ba dei ban pynïaid beit ïa ka jingjied rangbah shnong kumba ka Dorbar shnong ka la dep shim rai, hynrei u CEM u la kyrpad ïa ki ban pdiang ïa ka jingpynsangeh na ka bynta ka bit ka biang lang bad u la kular ruh ba ka KHADC kan shim khia ban ïoh pynlong ïa ka jingjied rangbah shnong bathymmai hapoh ka 18 tarik u Nohprah 2025.
Shuh-shuh u la ong ba lada kane ka jingkular jong u CEM ban pynlong hapoh ka 18 tarik kam urlong, ki paidbah nongshong shnong kin sa shim rai da kumwei pat da kaba u la bynrap ba ha ki snem ba la dep kam ju don kano-kano ka jingwan tuklar ki bor ba nabar haba ïadei ki kam shnong hynrei kaba la jia khyllah ha kane ka kynti.
