Shillong, Nohprah 12
U Executive Director ka North Eastern Electric Power Corporation (NEEPCO) u Jayanta Sarma u la ïathuh ba ka NEEPCO ka don kawei ka jaka ban pynmih bording ha Meghalaya kata ha Wah Umiam kaba don ha Mawphu, East Khasi Hills District hynrei haduh mynta kim pat lah ban ïaid shakhmat namar kim pat ïoh jaka na ki paidbah.
Haba ïakren bad ki nongthoh khubor na Shillong bad Guwahati ha Kupili Hydro Power Station Office & Colony Complex kaba don ha Umrangso, Dima Hasoa district Assam kaba la long ha ka 10 tarik mynta u bnai u la ong, ka Sorkar Meghalaya kam donbor halade ïa ki jaka namar ka donbor tang kumba 6 percent eiei ki jaka ba ka lah ban pynïaid namar ïa ki jaka la bat da ki paidbah.
U la ïathuh ruh ba ka NEEPCO haduh mynta kam pat ïoh ïa ka Forest Clearance Certificate na bynta ka Wah Umiam project kaba don ha Mawphu, East Khasi Hills District.
U Jayanta Sarma u la pyntip ba ka NEEPCO ka la sdang ban shna ïa ka jaka pynmih bording kaba heh bha ha wah Siang kaba don ha Arunachal Pradesh kaba lah ban kit haduh 1126 Mega Watt.
U la ïathuh ba ka NEEPCO ka la don hynriew tylli ki hydro power project kata mar kawei ha Assam, Nagaland bad Mizoram bad 3 tylli ha Arunachal Pradesh kaba ka jingpynmih bording ka long 1525 megawatt.
U la pyntip ba napdeng kine ki hynriew tylli ki jaka pynmih bording da ka um kaba heh duh dei ki lai tylli ki project ha Arunachal Pradesh.
Katba ka jaka pynmih Gas Power Station ki don lai tylli kawei ha Assam bad ar tylli ha Tripura.
Shuh shuh u la pyntip ba ka Solar Power Station kawei ka don ha Tripura bad kawei sha Rajasthan.
Shuh shuh u Jayanta u la pyntip haba ki project jong ka NEEPCO ki la poi, ka ju shna ïa ki surok, katei ïa ki skul, ki jaka sumar, ki bank, post office, jaka ïew, madan phutbol, ki jaka ai jinghikai ïa ki samla bad ban kyntiew ruh ïa ki kam jngohkai pyrthei kaba lah ban pyndonkam da ki paidbah jong ka thaiñ.
Ha kane ka jingleit jurip ki nongthoh khubor na Shillong sha Kupili Hydro Project ki bor pynïaid ka NEEPCO ki la ïalam ban pyni ïa ka jingtreikam ka Power House ha Khandong kaba dei ka project ba nyngkong duh jong ka NEEPCO naduh ba la seng ïa ka.
