Shillong, Nohprah 12
U Myntri ba khmih ïa ka tnad Water Resources ka Sorkar Jylla, u Bah Metbah Lyngdoh u la pyntip ba ka Sorkar pdeng ka la pyllait ïa ka pisa kaba kot T.51 klur na ka bynta ki kontraktor kiba la pyntrei ïa ki kam kiba pher-bapher.
“Ha kine ki khyndiat sngi ban wan, yn sa pyllait noh ïa kane ka pisa sha ki kontraktor,” la ong u Bah Metbah Lyngdoh haba kren sha ki lad pathai khubor ha ka sngi Palei jong ka taïew.
U la ong ruh ba kaba sah mynta ka long sa ka T.5 klur ka ban pyllait da ka Sorkar Jylla bad ba kane ka pisa kaba ïoh mynta kadei na ka bynta ki 3 tylli ki skhim.
Haba kylli, u Bah Metbah u la ong “Ka jingslem ban pyllait ïa ka pisa kadei na ka Sorkar Pdeng”.
Nalor kata, u la ong ruh ba ka tnad ka la ju dawa borabor na ka Sorkar Pdeng ban pyllait noh ïa ka pisa hynrei kim shym la ïoh ïa ka jubab kaba shai bad mynta ka kynti pat ki la ai bad ka pisa ba dang sah ruh na ka liang ka tnad kan dang ïai dawa.
“Ngeit skhem ba ngin sa lah ban ai noh ïa kane ka pisa sha ki kontraktor, khnang ba kan lah ban ïarap ïa ki kontraktor baroh namar ba ki ïakynduh ïa shibun ki jingeh,” la bynrap u Bah Metbah.
U la ïathuh ba ka jingslem ban siew ïa ka pisa sha ki kontraktor kam dei na ka Sorkar Jylla hynrei dei ba ka Sorkar Pdeng ka pynslem ban pynpoi ïa ka pisa bad ka pisa ka bym pat poi ruh ka dang bun. “Ngi khmih lynti ba ka pisa ba dangsah kan sa poi lut ha u bnai Kyllalyngkot (January) 2026,” la ong shuh-shuh u Bah Metbah.
U Bah Metbah u la ong ruh, “Ngin sa nangïai buddien shuh-shuh halor ka pisa ba dangsah bad ha kine ki taïew ban wan ngan sa leit sha Delhi ban ïakynduh ïa ka tnad ba dei peit ban pyllait ïa ka pisa, ban pynthikna ba kane ka pisa ba dangsah ruh kin danglah ban pyllait noh kham kloi.
