Shillong, Nohprah 18
Ha ka lyngkhuh sngi ïap ba 85 snem u Myllung Soso Tham, ka Khasi Students’ Union, Mawlai Circle ha ryngkat ka jingïatreilang bad ka KSU NEHU Unit, ka la pynïeng ïa u mot dur ba shirynïeng jong u Myllung Soso Tham, ha phyllaw ka Central Library ka NEHU.
Ka jingplie ka KSU ïa u dur mot ba itynnad jong une u riewkhraw ka Ri Khasi ka dei shibynta ban kynmaw burom ïa ki kam bakhraw ba u Myllung Soso Tham u la noh synñiang sha ka jaidbynriew lyngba ka thoh ka tar.
U Bah Lambokstarwell Marngar, President ka KSU haba ai jingkren ha ka jingïalang u la ong ba, ka jingthoh u Myllung Soso Tham, “Ba ngin long ki nongtong um bad ki nongthoh dieng jongno re jongno” kam dei ba u kren jem daw, hynrei kine ki kyntien ki dei ba u Myllung u kyrsiew thiah ïa ka jaidbynriew ba ki khun samla kim dei ban kheiñ sting.
“Ki bor ba nabar ki ap kmang tang kumno ban pynjot ïa kane ka Ri kaba ïeid ka jong ngi, ka tyrpeng bad ki ksangkti ki khun samla ba kin tei thymmai khamtam ba kin ïeng ha ka nongrim ban ïakhun pyrshah ïa ki bor ba nabar ban pynneh pynsah ïa ki riti ki dustur, ka ktien ka thylliej, khamtam ka jinglong ba kyrpang ka Ri.” la ong u Bah Lambok.
Shuh-shuh u la ong haba phai sha ka jingshngaiñ bad ka jingdonkam ki aiñ ban ïada ïa ka jaidbynriew, ha ka snem 2019 ka ïingdorbar thaw aiñ ka la mynjur ïa ka Resolution bad ka la phah sha ka Sorkar India, hynrei haduh mynta ym ïohi dak eiei la ka Sorkar kmie kan pyntreikam ne em ïa ka Inner Line Permit (ILP), “Ka MRSSA kaba la long aiñ naduh u snem 2016, hynrei ym tip ka Sorkar ka leh aiu bad haba kylli ïa kane aiñ, ka Sorkar India ka buh dak jingkylli.”
U la ong ba ka Sorkar ka lah ban leh ïa kino-kino ki kam kiba kyllaiñ bad ban pynartatien, hynrei ki samla ka jaidbynriew ki long ka aiñ ban ïada ïa ka ri bad ka jaidbynriew baroh kawei.
U Bah Lambok u la ong ba kane ka jingïalum lang ka dei ka sngi ban pynïeng ïa u mot dur ba shirynïeng jong u Myllung Soso Tham ha ka skulbah NEHU, hynrei ka jingkylli ïa ka jaidbynriew ka long, “Hato ngi dang lah mo ban sei shibun ki ban long ki Myllung Soso Tham ha ka jaidbynriew?”
“Ki don shibun ki samla kiba la nang la stad ha kane ka juk, hynrei hateng ki long da khongphong ha ka rukom pyrkhat pyrdaiñ, u Myllung Soso Tham ym tang ba u pynriewspah ha kaba thoh poitri hynrei u la noh synñiang shibun ha ka ban pynriewspah ïa ka ktien Khasi,” la ong u Bah Lambok.
U la ong, “ka long ka nuksa ïa ki samla la ki don ha kano-kano ka bynta ba u Blei u la ibit ban buh, hynrei to pyndonkam hok ïa kata ka sap ka phong ba kan long ka jingkyrkhu ïa ka jaidbynriew.”
