Shillong, Nohprah 18
U Lat ka Jylla, u C.H.Vijayashankar u la ong ba dei ban weng noh ïa ka jingrakhe ïa ka sngi ïap u Myllung Soso Tham hynrei ka Sorkar ka dei ban kynmaw burom pat ïa ka sngikha jong u.
U la banjur ruh da kaba ong “Ka jingim jong u ka kham kongsan ban ïa ka jingïap”.
Ïa kane u Lat ka Jylla u la kren ha ka sngi kynmaw burom ïa ka lyngkhuh sngi ïap ba 85 snem jong u Myllung Soso Tham, ha ka 18 tarik u Nohprah 2025, ba la pynlong ha State Central Library, Shillong.
Shuwa kane, u Lat ka Jylla u la leit ban buh syntiew ha u Motdur sah kynmaw jong u Myllung Soso Tham, kaba don ha phyllaw ka State Central Library, kum shibynta ban kynmaw burom ïa ka lyngkhuh sngi ïap ba 85 snem jong u ha ryngkat ka jingïadon lang u Myntri ba khmih ïa ka tnad Atrs and Culture, u Bah Sanbor Shullai, u Bah Fredrick R.Kharkongor, Principal Secretary Arts and Culture, ki bahaïng hasem jong u Myllung Soso Tham, ki samla pule bad kiwei-kiwei de.
U Lat ka Jylla u la sam ruh ïa ki khusnam sha ki samla pule kiba la ïa shim bynta ha ka jingïakop thoh poitri, bud sa ka jingpynkup burom ïa ki bahaïing hasem jong u Soso Tham.
U Lat ka Jylla, u la pynkynmaw ruh ïa ka jingnoh synñiang bad ki kam jong u Myllung Soso Tham sha ka Ri-Khasi baroh kawei.
U Lat u ong “Ngan sa ïa kren bad ka tnad Arts and Culture ka Sorkar Jylla, ban pynkylla noh ïa ka jingkynmaw burom ïa u Soso Tham ban rakhe ïa ka sngikha jong u ha ka jaka ka sngi ïap”.
U la ong ba ka sngikha kadei kaba donkam bha ban rakhe. “U Myntri u dei ban ïakren ïa kane ha Ïingdorbar ban pynkylla ïa ka sngi ïap sha ka sngikha, ban rakhe kynmaw burom ïa u Myllung Soso Tham,” la bynrap u Lat.
Na ka liang u Myntri ba khmih ïa ka tnad Arts and Culture ka Sorkar Jylla, u Bah Sanbor Shullai u la pynkynmaw ïa ki synñiang jong u Myllung Soso Tham uba la noh na ka bynta ka jaitbynriew.
“Dei tang u Myllung Soso Tham uba da ieid shisha ïa ka ri bad ka jaitbynriew lyngba ki kam kiba u la leh,” u la ong.
Nalor kata, u Bah Sanbor Shullai u la ong ba yn sa tei noh da u Motdur ba shirynïeng jong u Myllung Soso Tham ha State Central Library.
Nalor kata, ula pynkynmaw ruh ïa ki kot kiba u Myllung Soso Tham u la thoh, kiba kynthup ‘Ka Duitara Ksiar’. Da kaba ong “Ym don shuh da kiwei pat kiba ieid shisha ïa ka jaitbynriew kum ba ieid u Myllung Soso Tham”.
