Shillong, Nohprah 19
U Myntri Rangbah ka Jylla, u Conrad K. Sangma u la pyntikna ba ïa ka kaiphod jong ka ‘Expert Committee’ halor ka ‘State Reservation Policy’, kaba khia kumba 200 kilo bad kaba don kumba 4,000-5,000 sla, yn sa pyllait paidbah noh shen.
Haba jubab halor ka rai u President ka VPP, Bah Ardent Basaïawmoit ban pynlong ïa ka jingïakhih lada ym pynpaw paidbah ïa ka kaiphod, u Sangma u la ong: “Yn sa pyllait paidbah, kumba nga la ong ba ka long kaba heh bha, ka dei ka kaiphod kaba 200 kilo, kata ka long kum 4000-5000 sla bad yn hap ban ïaid lyngba man la kawei-pa-kawei ka kyntien naba wat tang i ‘comma’ ruh ka lah ban pynkylla ïa ka jingmut jong ka kaiphod ne ka jingmut jong kata ka laiñ.”
U la batai ïa kane ka kam ba radbah, da kaba ong ba ki ophisar ki hap ban khmih bniah bha bin-pa-bin ïa kawei-pa-kawei ka sla.
“U Chief Secretary bad kiwei-kiwei ki ophisar ki la hap ban ïaid lyngba man la ka laiñ, man la ka sla bad ka dei ka kam kaba heh bha…kin sa aiti ïa ka bad kin sa pyni ïa ka sha ka Kynhun Myntri bad hooid, tang mar ïa ai ïa ka ha ngi, ngin sa pynpaw paidbah naba ym don jingkylli hi ruh ban ym pynpaw paidbah ïa ka.”
Shuh shuh u Sangma u la ban jur halor ka jingdonkam jong ka kaiphod sha ki paidbah, da kaba bynrap: “Ngin sa pynpaw paidbah tikna hynrei…namar ba ka dei ka kam kaba hap ban phikir bha, ki ophisar kim lah ban shu iehnoh kumto wat tang kawei ruh ka sla ne wat tang kawei ruh ka kyntien.”
