Jowai, Nohprah 21
U nongïalam ka seng kieng atiar Hynñiewtrep National Liberation Council (HNLC) bad uwei pat u runar uba la shah thwet jur halor ka jingdonkti ha ka kam leh beijot khynnah ki dei kiba la ithuh kum ki nongsylla halor ka jingpynbthei bom IED ha ka jaka treikam jong ka Dhar Company kaba don ha ka shnong Shymplong, East Jaiñtia Hills.
Katei ka jingbthei bom kaba la jia ha ka miet jong ka 15 tarik Nohprah ka la pynjulor ïa kawei ka trok kit um hynrei kam shym la don kano kano ka jingmynsaw ne ïap briew kumba la kam da ka HNLC.
Hadien katei ka jingjia, ki pulit ki la ïoh ban kem noh ïa u Richard Suchen (31) bad u Pynshaitbor Syih (45 snem rta), baroh arngut kiba dei na ka shnong Shymplong, EJH.
“Ka jingtohkit kaba dang ïaid shakhmat ka la shem ba uwei u briew uba la tip kyrteng kum u Smiki Tongper na ka shnong Shymplong bad uwei pat u dkhot ka HNLC u Issei Sungoh na Khliehriat ki dei kiba ïasylla ban pynbthei ïa utei u bom ha ryngkat ki arngut kiba la shah kem,” ong u Superintendent of Police ka EJH Vikash Kumar ha ka 21 tarik Nohprah.
“Katba u Smiki Tongper u dei ruh uba la shah thwet halor kawei pat ka case leh beijot khynnah ba la register hapoh ka POCSO Act, u Issei Sungoh u dei uba la shah thwet halor ka jingpynbthei bom IED kaba la jia ha Police Reserve ha Khliehriat lem bad kiwei pat ki kam bymman,” ong u heh pulit.
Ha ka jingkhynra hapoh ka ïingsah jong u Tongper, ki pulit ki la ïoh ban kurup shibun bah ki tiar shna bom bad kiwei pat ki tiar kiba kynthup ïa ki 3 roll ki safety fuse bad 2 tylli ki safety fuse barit, 3 tylli ki detonator, ki bakhor, 82 tylli ki splinter, kawei ka suloi shna hi, 82 tylli ki splinter barit, artylli ki handset bad 5 tylli ki fuse.
Na ka liang u SP u kyrpad ïa ka jingïarap lem jong ki riew paidbah lada ki don jingtip ha kaba ïadei bad kiwei pat ki runar kiba donkti ha katei ka kam pyntriem ba kin pyntip mardor sha ki bor pulit da kaba pynthikna ban buhrieh ïa ki kyrteng jong ki bad ban ai khusnam ïa ki.
Ïa kane ka case la register hapoh thanad Lumshnong ha ka kyndon 109(1),?113(1),?113(2),?(113),?326(f) bad?327(2) jong ka Bharatiya Nyaya Sanhita, bad ka kyndon?3 jong ka Explosive Substances Act.
Ka HNLC ka la shim ïa ka jingkitkhlieh halor katei ka jingpynbthei bom IED da kaba kam ba ka thmu pyrshah ïa ki jingdon jingem jong u Symbud Myntri Rangbah ka Jylla u Bah Sniawbhalang Dhar namar ka jingkyntait ban siew ïa ka pisa kaba la dawa da ka seng.
