Shillong, Nohprah 21
U Symbud Myntri Rangbah Bah Sniawbhalang Dhar u la pynthikna ba ka Sorkar kan ym pyndem pyrshah ïa ki kam pyntriem ki kaikhlaw, haba pyntip ban ym sngap jar ne ailad ruh ïa ki jingbyrngem na ka Hynniewtrep National Liberation Council (HNLC).
U Bah Sniawbha u la pynrem jur ruh ïa ka jingpynbthei bom improvised explosive device (IED) ha phyllaw ka Dhar Construction Company ha Shym-plong, East Jaiñtia Hills.
“Ngi na ka Sorkar ngin ym shu sngap jar ïa kum kine ki jingbyrngem. Ngi pyrshah jur ïa kine, khamtam haba tip ba ka HNLC ka dei ka seng ba la kheiñ beaiñ. Donbok, ki pulit kila shimkhia mardor bad kem ïa katto katne ki briew, bad ngi ngeit ba ki pulit kin leh ïa ki kam katkum ka aiñ,” ong u Bah Sniawbhalang.
U la kynthoh jur ruh ïa ki jingkren kyllain jong ka HNLC haba ïadei bad ka jingdawa pisa haba ong, “Phi la ïohi ba kila kren kyllain da ma ki hi. Katto katne bnai mynshuwa kila kam ba u Bah Sniawbhalang Dhar u la siew ïa ka jingdawa bad mynta kila ong ba u khlem siew sha ki. Kumta, kine ki jingkynnoh baroh ki dei ki bym shong nongrim bad bym ïahap”.
U Symbud Myntri Rangbah u la ban jur ïa ka jingkut jingmut ka Sorkar ban ïakhun pyrshah ïa ki kam pyntriem ki riew kiengatiar bad ki nongpynthut ïa ka suk ka saiñ haba kyntu ïa ki paidbah ba kim dei satia ban sheptieng.
“Nga kwah ban phah ïa ka khubor kaba shai sha ki paidbah ka Jylla, kynthup ki samla, ba ngin ym pyndem ha kino kino ki kynhun kaikhlaw. Ngi long pyrshah ïa ki kynhun ba pynthut ïa ka suk ka saiñ ka imlang sahlang. Ngi kyntu ruh ïa ki paidbah ka Jylla ba kim dei ban sheptieng naba ka Sorkar ka ïadon ryngkat bad ki”.
Haba ïai pynpaw ïa ka jinglong ba kloi ka Sorkar ban ïakren ïasuk, u Bah Sniawbhalang u phah ïa ka jingkhot sngewbha sha ka HNLC ba kan wan sha ka jingïakren ïasuk.
“Ka jingkhang ka plie na ka bynta ka jingïakren ïasuk bad ka HNLC. Ha ka jingshisha, kila wan sha ka jingïakren ïasuk ha ka kyrdan u Myntri Kam Pohïing bad haduh mynta ka jingkhang ka dang ïai plie. Ngi kwah ïa ka jingsuk kaba neh slem ha Jylla bad ban pynthikna ba ka suk ka saiñ ka don ha Jylla,” u la ong.
