Shillong, Nohprah 21
U bnai Nohprah uba dei u bnai jong ka jingrakhe baroh ki riewngeit Khristan ha ka pyrthei hi baroh kawei ïa ka sngi Khristmas (ka jingkha ïa u Jisu Khrist) bad ka dei ruh ka por ba ki paidbah riengeit ki ju lehkmen ha kane ka sngi.
Man la u snem ha ka 25 tarik u Nohprah ki paidbah riewngeit Khristan ki ju lehkmen shitrhem ha kane ka sngi jong ka jingkha ïa u Jisu Khrist bad ki ju pynlong ruh ïa ka jingrakhe lypa shuwa ban poi ka sngi Khristmas.
La sakhi ruh ba ka Nongbah Shillong mynta ka la iphuh iphieng da ki jingpynthaba da ki light ha kylleng ki jaka, kiba la buh pynitynnad da ki dieng Khristmas, ki dur jong ki Angel bad kiwei kiwei de ki dur ba itynnad.
Ka jingpynitynnad ban pynphuh ïa ki jaka ha Nongbah Shillong ka ju pher na ka snem sha ka snem bad mynta u snem ruh ka long kaba la itynnad haduh katta katta namar ha man la ki jaka ha Nongbah Shillong la pynitynnad lyngba ki light ban pynthaba ïa ka surok.
Ki jaka kiba la pynitynnad bad pynphuh ki kynthup ïa ka Khyndailad, Motphran, Laitumkhrah, bad ha kiwei kiwei de ki jaka ha Nongbah Shillong.
Ki Balang bapher-bapher ha Nongbah Shillong ha kine ki taïew ki la pynlong ïa ka jingïaid Carol, kum shi bynta ban lehkmen shuwa ban poi ka sngi Khristmas.
Ka Khyndailad kaba dei kawei ka ïew kaba heh tam ha Shillong, ka la dap da ki jingpythaba ter ter jong ka surok bad lakhi ruh ïa ka jingwan tuid ki paidbah na kylleng ki jaka, ban shondur ïa ka jingitynnad jong ka jingpynthaba da ki lait.
