Shillong, Nohprah 21
Ka Kynhun Myntri jong ka Sorkar Jylla ka la mynjur ïa ka State Curriculum Framework na ka bynta ka kyrdan ba sdang jong ka jingpule, da kaba wanrah ïa ka ‘syllabus’ ba la pynthymmai na ka bynta ki Pre-School bad Class-I, ryngkat bad ki kot pule ba thymmai. Ka jingsaiñdur thymmai ka pynlong ïa baroh ki khynnah ban pule ïa baroh ar ki ktien, kata Khasi bad Garo.
“Ka Kynhun Myntri ka la mynjur ïa ka State Curriculum Framework na ka bynta ka ‘foundational stage’. Ïa ka ‘syllabus’ na ka bynta ki Pre-School bad Class-I, la mynjur bad la wanrah ïa ki kot pule ba thymmai”, la ong u Myntri Rangbah ka Jylla u Conrad K Sangma haba kren sha lad pathai khubor.
U la bynrap da kaba ong ba ka phang pdeng ka buh jingmut bha ha ka jingpynroi ïa ka jinglong, ban pynrung ïa ki jinglong ba kongsan, bad ban pynroi ïa ka jingsngewthuh ïa ka kolshor bad ka histori hapdeng ki khynnah pule.
“Ha ki por ba sdang ngi dang pynleit jingmut ha ka jingpynroi ïa ka jinglong briew, ki katto katne ki jinglong, bad ki bynta jong ka kolshor bad ka histori jong ka Jylla,” la batai u Myntri Rangbah.
U la ong ba baroh ki khynnah kin hap ban pule ïa ka ktien Khasi bad Garo.
“Ngi bthah ïa uwei pa uwei u khynnah ban nang ïa baroh ar tylli ki ktien Khasi bad Garo,” ong u Myntri Rangbah ka Jylla da kaba kdew ba ki kot pule ha baroh ar tylli ki ktien ki long shi bynta jong ka jinghikai.
La pynbeit thymmai ïa ka rukom treikam khnang ba ki jingmut ba kongsan kin kham suk ïa ki khynnah ban sngewthuh.
Katba ki don ki skul kiba la dep ban shim ïa ka ‘syllabus’ na ka bynta u snem pule ban wan, hynrei ka kot pule ba pura kan long kaba donkam naduh u snem ban wan. Na ka bynta une u snem, ki skul ki lah ban jied ban pyndonkam ïa ki kot thymmai da ka mon sngewbha.
