Nongpoh, Nohprah 21
Ki nongïalam jong ka Ri Bhoi Pick-up Owners and Drivers Association (RBPODA) ki la leit ban ujor syndon da ka ejahar pyrshah ïa ki bar jylla kiba ka seng kala kynnoh ba ki pynïaid beaiñ ïa ka ïew Muid kaba don ha ki thaiñ Byrnihat khlem don satia ïa ki kot ki sla kiba biang.
Ha katei ka jingleit ujor ejahar ha thanad Byrnihat, la ïalam da u Bah Standwell Manih President, u Bah Sam Kharnaior Finance Secretary ha ka jingdon lang ki dkhot ka seng.
Haba kren sha ki lad pathai khubor, ki nongïalam jong ka seng ki la pynpaw ba ka daw kaba la pynlong ïa ki ban ujor syndon da ka ejahar ka dei halor ka jingleh baheh kitei ki bar jylla kiba pynïaid beaiñ ïa katei ka ïew Muid khlem da kheiñ snep ne aikam aijam ïa ki khun samla ka thaiñ.
Kitei ki nongïalam kila kynnoh ruh ba wat hadien bunsien ba ka seng kala leit ban kynduh ïa ki bar jylla lem bad katto katne kita ki ‘High Level’ ban aikam aijam lem ïa ki khun samla, hynrei kala shu kut tang ha ki jingkular khlem poi shaei shaei ruh.
Shuh shuh ki nongïalam ka seng ki la kynnoh ruh ba ka jingdon jong katei ka ïew Muid ka khlem ai jingmyntoi satia ïa ki khun samla ka thaiñ kiba shu shong khlem kam khlem jam bad kumta na ka liang ka seng kam lah ban shu shong kli kti, hynrei ban ujor ejahar pyrshah ïa ki bar jylla kiba pynïaid beaiñ ïa katei ka ïew khlem don satia ïa ki kot ki sla kiba biang na ki bor ba dei khmih ka Sorkar.
