Shillong, Nohprah 22
Ka Kynhun kiengatiar ba la kheiñ be-ain-ka Hynñiewtrep National Liberation Council (HNLC) kala kyntait ïa ka jingkam ki Pulit ba kila kem ïa ki dkhot ka seng ba donkti ha ka jingpynbthei bom IED hapoh ka Dhar Construction Company haba hukum ruh ïa u trai bad Symbud Myntri Rangbah ka Jylla, Bah Sniawbhalang Dhar ba u dei ban hap siew sha ka pla tyngka ka seng kum ka khajna.
“Ka jingkam jong ki pulit ba ki la ïoh kem ïa ki dkhot kiba donkti ha katei ka jingjia ha Dhar Company ka dei tang ka jingthok kaba shai. Kito ki briew kiba ki kem kim dei ki dkhot ka HNLC, bad baroh kito ki tiar kiba ki la kurup ki dei ki tiar jong ki pulit hi,” ong u General Secretary ka HNLC Bah Sainkupar Nongtraw ha ka kyrwoh ba pyllait ha ka sngi Nyngkong.
Katkum ka jingong jong u, “Ki dkhot ka HNLC kiba donkti ha ka jingpynbthei ïa u IED ha ka 15 tarik ki la wan phai suk sha ka ktem lajong,” haba buh jingkylli “Lada ki pulit ki la tikna ba dei kito ki briew kiba donkti, balei pat ki dang rah sa ïa ka lok u Emanuel Suchen@Shwa, u dkhot ba satar bad ba shitrhem ka HNLC?”.
U Bah Sainkupar u la ong, “Ha ka histori jong ka HNLC ym pat ju don ruh kawei ka sien ba ngi la rah ne pynthut ïa ki bahaïing bahasem jong ki Myntri ne ki Pulit. Pynban, ka tnad pulit ka ju kem bad pynthut ïa ki bahaïing bahasem jong ki dkhot ka seng. Ki la kem teng ruh ïa i kurim bad i kiaw jong u rangbah shipai jong ka seng kata ki dei kiba wan na ka ïing kaba don burom bha” haba bynrap “Ka rukom treikam jong ka HNLC mynta kam dei shuh kaba ïaid da ki buit treikam ki barim. Kumta ngi maham lypa ba lada ka tnad pulit kam sangeh ban kem bad pynthut ïa ki bahaïing bahasem jong ki dkhot ka seng, ngin sa leh tyngeh ïa kaba ngi dei ban leh.”
Halor ka jingkam ki Pulit ba uwei na kiba pynbthei bom u dei uba donkti ha ka case POCSO ne leh beijot khynnah, ka HNLC kala ong, “Ka tnad pulit ka kam ba uta u briew uba donkti ban pynbthei bom u dei uba don jingïadei bad ka POCSO bad ki pulit ki shu ïathuh khana kai ïa ki lad pathai khubor ba ki shu register tang ïa ka case ïa uta u Tongper. Lada kane ka jingkynnoh ka long kaba shisha balei kim kem, kim tohkit bad rah sha ïingbishar?
“Kaba thamula ka long ba ïa kane ka jingkam ki pulit la nang shut pynjlih shuh shuh da ki katto katne ki lad pathai khubor. Ka aiñ POCSO ka dei ka aiñ kaba khor bha, Kiba don ïa ka case POCSO, ka aiñ ka treikam stet haduh katta-katta, ka jingpynsawa ki media kan nym lah ban bujli ïa ka jingtreikam hok ka aiñ. Ka jingkynnoh khlem ki sakhi ne khlem da rai pynrem da ka ïingbishar hi kan shu kut tang ha ki jingkynnoh. Kane ka jingkynnoh ka tnad pulit ka dei tang shi bynta ban pynthohbria ïa ka HNLC,” kala ong.
Halor ki jingjulor na ka jingpynbthei bom, ka HNLC kala ong ba ka jingpyni jong ki pulit ïa ka kali kit um kaba la julor ka dei tang i ‘phngit i barit’ ban tap eit-miaw ïa ka jingshisha kaba la jia ha katei ka jaka.
Haba pynshai ïa ki daw ka jingpynbthei bom, u Bah Sainkupar u la ong, “Ka jingkam jong u Conrad bad u Sniawbhalang ba ka HNLC ka ong shiphang u Sniawbhalang u siew, shiphang ym siew, ka dei tang ka jingkwah kyllain jong ki hi. Mynshwa u Sniawbhalang u la bei tyngka ïa ka HNLC, hynrei hadien pat u la shet kylla ïa ngi da kaba ym treh shuh ban bei tyngka. Na kata ka daw, ngi la hiar thma ïa ki jingdon jingem jong u. Kane ka jia kumjuh kumba la jia ha ka histori, u Rajiv Gandhi ruh nyngkong u kyrshan bha ïa ka LTTE, hynrei hadien u kynran dien noh, te u duh syndon ïa la ka jong ka jingim”.
“Ka HNLC ka maham lypa ïa baroh ki nongtrei nongbylla jong u Sniawbhalang ba kin sangeh ban trei bad u, khamtam eh ïa ki bar jylla. Lada ngin pynbthei sa shisien, ngin leh da kaba khamheh shuh shuh, ym tang 30 kilo kumba ngi pynbthei ha katei ka miet, hynrei ngin buh ban pynbthei haduh 60 kilo ha kano-kano ka jaka ba longtrai da u Sniawbhalang bad ngin nym kitkhlieh lada ka jia kano-kano kaba sngewsih,” u la ong.
