Shillong, Nohprah 22
Kum shi bynta ban jubab ïa ki jingpynbeit ba dang shen jong ka Sorkar Pdeng haba ïadei bad ka mat treikam ka Mahatma?Gandhi National Rural Employment Guarantee Act (MGNREGA), u nongïalam ka BJP bad MLA ka Pynthorumkhrah, u Bah A.L. Hek u la pynpaw ïa ka jingkyrshan, da kaba kdew ïa ka jingdonkam jong ka jingbei tyngka kaba ïatreilang bad ka jingkitkhlieh kaba ïasam hapdeng ka Sorkar Pdeng bad ki Jylla.
Haba kren sha ki lad pathai khubor ha ka Lah Sngi U Blei, u Bah Hek u la ong, “Ngi sngewkhia ïa ka roi ka par. Ka kyrteng kaba la ai kham mynshwa-NREGA-ka long ruh kaba bha. Lada ka BJP ka kwah ban pynkylla ïa ka kyrteng bad lada ka long kaba lah ban pdiang da baroh, te ngim don jingeh, naba ka thong jong ngi ka long ban ïaid shakhmat bad ka roi ka par. Ki nongkyndong khamtam kito kiba bat ïa ki ‘Job Card’ na ki longïing BPL ki la ïoh jingmyntoi lypa; mynta kin sa ïoh shuh-shuh ïa ki sngi trei.”
U la bynrap ba ka jingpynkylla ïa ka jingbei tyngka kaba 90:10 hapdeng ka Sorkar Pdeng bad ki Jylla ka long kaba lah ban pdiang, da kaba kdew ba ka jingïashim bynta jong ka Jylla ruh ka long kaba donkam na ka bynta ka jinglong trai ba shisha ïa ka skhim.
“Wat na ka liang ka Jylla ruh ngi dei ban don ka jingkitkhlieh. Lada ngi wanrah kano-kano ka roi ka par, ka Jylla ruh ka dei ban shim ïa ka jingkitkhlieh. Haba ka Sorkar Pdeng bad ka Jylla ki ïatreilang, ka don ka jingïasam lang ïa ka jinglong trai. Lada ka pisa ka wan tang na ka Sorkar Pdeng, kin kam ïa ka kum ka skhim kaba la bei da ka Sorkar Pdeng. Da kaba ïasam ïa ka jingbei tyngka, ngi lah ruh ban ïasam lang ïa ka jinglong trai ha ka ban pyntreikam ïa ka skhim,” u la ong.
Shuh shuh u Bah Hek u la ban jur ba ka jingpynjlan ïa ki sngi trei hapoh ka prokram kan wanrah ïa ki jingmyntoi ba kham khraw sha ki jaka nongkyndong ha kylleng ka ri India, kynthup ïa ka Meghalaya – da kaba pynkhlaiñ ïa ka jingshngaiñ ha ka ïoh ka kot bad ki jingtei ha ki jaka nongkyndong.
