Betasing, K’Lyngkot 09
U National President ka National People’s Party (NPP) uba dei ruh u Myntri Rangbah ka Jylla, u Conrad K. Sangma ha ka Sngi Palei u la ong ba ka seng ka la pynkhreh shaid-shaid na ka bynta ka ilekshon ban wan sha ka Garo Hills Autonomous District Council (GHADC), bad kyntu ïa ki nongïalam bad ki nongkyrshan jong ka seng ban ïatreilang kum ka kynhun kaba ïatylli khnang ban kyntiew shuh-shuh ïa ka roi ka par ha ka Jylla.
Haba kren ha ka jingïalang jong ka seng ha Betasing, South West Garo Hills, ba la ïashim bynta lang da ki nongïalam ba rangbah ka seng, MLA bad Myntri Sorkar, u Marcuise Marak, une u khlieh nongïalam ka NPP u la khot ïa ki nongtrei ka seng ban ai ka jingshaniah ha ki nongïalam bad ka jingkhlaiñ jong ka seng.
“Haba ki briew ki ai ha ngi ïa ka rai, kam dei na ka bynta ka jingmyntoi shimet jong ngi. Kane kam dei ka bor jong ngi, kane ka dei ka jingkitkhlieh jong ngi,” la ong u Sangma.
“Kum ka seng kaba synshar, ngi dei ban kylli ïalade man ka sngi kaei ka jingpher kaba ngi wanrah ha ka jingim jong ki paidbah jong ngi. Ngim dei ban pynleh nohei wat tang shi sngi bad ngi dei ban trei da ka mynsiem na ka bynta ki paidbah kiba la pynkhamti ha ngi ïa kane ka jingkitkhlieh,” u la ong.
Haba pynpaw ïa ki jingeh ba ka GHADC ka ïakynduh ha ki snem ba la dep, khamtam eh ha kaba ïadei bad ka jingsahkut tulop, u Sangma u la batai ba ka Sorkar Jylla, watla ka burom ïa ka jingsynshar ba laitluid jong ka Council, ka la shim ïa ki sienjam kiba treikam ban pynduna ïa ka jingbankhia ïa ka jingeh ba ki nongtrei ka Council ki ïakynduh.
“Ka GHADC ka dei ka kynhun kaba laitluid bad kaba synshar hi dalade ïalade, bad ka Sorkar Jylla kam lah ban tuklar beit-beit ha ki kam jong ka,” u la pynshai.
“Hynrei da kaba sngewthuh ïa ki jingeh ba ki nongtrei ki ïakynduh, ngi la tuklar ha ka rukom kaba tei da kaba thaw ïa ka komiti ban ïakren bad ki MDC bad ki nongtrei jong ka Council. Da kaba pynshong nongrim ha ka jingïamir jingmut, ngi la pyllait hashuwa ïa ki jingsam ‘Royalty’ ban ïarap pynkhuid ïa ki jingsahkut kumjuh ban pyntikna ïa ka jingsiew tulop ba man u bnai,” ong u Sangma.
U la bynrap ba ka Sorkar Jylla ka la pynkhuid ruh ïa ki baibam ba sahteng ba la slem jong ki MDC barim, da kaba pynpaw biang ïa ka jingkular jong ka Sorkar ban weng ïa ki jingeh ba shisha ha ka rukom kaba don jingkitkhlieh.
“Ka la don ka por ba ka ophis jong ka GHADC ka la khang da ki bnai namar ka kynrum-kynram. Ngi la shim ïa ka kamram ban sngap ïa baroh arliang bad ban wad ïa ka lad ban pynbeit ïa kane ka jingeh. Bun kiba la pyrshang ban pynlong politik ïa kane ka kam, hynrei ka Sorkar jong ngi ka la jied ïa ka ‘Resolution’ ban ïa ka jingkynnoh,” u la ong.
Haba kren halor ka ilekshon ban wan sha ka GHADC, u Sangma u la kubur ïa ka rukom synshar paidbah hapoh ka seng, da kaba kdew ba ki don bun ngut ki nongaplai kiba ju wad tiket na kajuh ka konstitwensi.
“Kane ka dei ka synshar paidbah. Baroh ki kwah ban kyrshan ïa la u jong u kyrtong, bad bun kiba pan tiket na ka seng. Hynrei ngim lah ban ai tiket sha baroh,” u la ong.
U la bynrap, “Shisien ba ka seng ka la shim ïa ka rai lyngba ka jingïamir jingmut bad jingkhmih bniah, baroh ki dei ban ïatylli lang bad kyrshan ïa u kyrtong ba tikna. Lada ym don seng, kata ym don eiei. Ngi dei ban long kiba kloi ban aiti na ka bynta ka jingbha jong ka seng.”
Shuh shuh haba ban jur ba ka jingkhlaiñ ha ka seng bad ka jinglong ryntih ki dei u budlum jong ka NPP, u Sangma u la ong, “Ka jinglong jong ka seng ka dei ka tynrai jong ka seng. Ngi dei ban pynkhlaiñ ïa ka NPP naduh tynrai. Ka jinglong nongïalam ka long kaba donkam ha man la ki jaka thep ‘vote’,” u la ong.
