Khliehriat, K’Lyngkot 09
Ha kawei ka jingjia aksiden ha ka miet 7 tarik Kyllalyngkot kaba la jia ha Khliehriat hajan ka Petrol Pump, kawei ka trok ka la leit ban tynrah ïa kawei ka ïing kaba don harud surok bad u nongñiah u la sahkut hapoh ka ‘Cabin’ jong ka trok.
Kane ka trok kadei kaba don ïa u nombor JKO2AT6315 ba la ñiah da u Surinder Singh (52 snem ka rta) uba na Jammu.
Ki pulit ka East Jaiñtia Hills District ki la pyrshang ban sei noh ïa utei u nongñiah uba la mynsaw bad hadien la pynkynriah noh sha CHC Khliehriat ban ïoh ïa ka jingïarap.
Hynrei ki doktor ki la pynbna ba u la khlad hashuwa bad la buh ïa ka met ïap hapoh ka ‘Morgue’ ka Khliehriat Civil Hospital.
Ha kawei pat ka jingjia aksiden, kawei ka longkmie kaba la tip kyrteng ka Lusia Lamare (28 snem ka rta) na ka shnong Moowakhu ka la khlad ha ka jingjia aksiden kaba la jia ha ka miet 5 tarik Kyllalyngkot ha Lad Moowakhu, East Jaiñtia Hills District.
Ki pulit kiba la poi ha kane ka jaka ki la pynkit mar-mar ïa ka sha Khliehriat Civil Hospital hynrei ki doktor ki la pynbna ba ka la khlad.
La suba ba ka jingshah tynrah kali ka lah ban dei, katba ka dang thmu ban jam sha shiliang surok.
