Shillong, Rymphang 01
U Myntri Rangbah ka Jylla, u Conrad K. Sangma, u la pdiang sngewbha ïa ka Mang Tyngka ka Sorkar Pdeng, bad ong ba ka long ka jingthmu kaba ïohi jngai bad kaba kyllum lang; kaba pynleit jingmut kyrpang ïa ka Thaiñ Shatei Lam Mihngi.
“Ka jingai khublei naduh mynsiem ïa ka Myntri tnad Pla Tyngka ka Sorkar Pdeng, ka Nirmala Sitharaman, kaba la wanrah biang sa shisien ïa ka Mang Tyngka ka Sorkar Pdeng kaba don ïa ka jingthmu kaba ïohi jngai bad ba kyllum lang ïa baroh – kaba buh ïa ka saiñdur kaba khlaiñ na ka bynta ka jingkiew ha ka ïoh ka khot kaba neh,” ong u Conrad ha ka jingthoh ha ka rynsan lad pathai.
Ha kajuh ka por, u la ïaroh ïa ka jingpyrkhat kyrpang ïa ka Thaiñ Shatei Lam Mihngi, da kaba ong ba ka pynpaw ïa ka jingkut jingmut jong ka Sorkar ban pynkylla ïa ka thaiñ sha ka ‘Engine’ kaba khlaiñ jong ka thaiñ Mihngi.
“Nga pynpaw ka jingsngewnguh kaba khraw ïa ka bad ïa ka jingïalam ba ïohi jngai jong u Myntri Rangbahduh ba donburom, u Narendra Modi ji, na ka bynta ka jingshimkhia jong ki ïa ka synshar-khadar kaba pynshong nongrim ha ki paidbah bad ka roi ka par jong ka ri kaba kynthup lang ïa baroh,” la bynrap biang u Conrad.
