Shillong, Rymphang 01
Ki Nongïalam ka National People’s Youth Front (NPYF) ha ka 30 tarik u Kyllalyngkot 2026 ka la pynïar shuh-shuh ïa ka shnat treikam jongka da kaba ka la ïoh ban pynskhem ïa ki nongïalam ka Farmer’s Front Sohra Block bad nongïalam ka National People’s Youth Front Sohra Block.
Ha kane ka sngi la wan ban ïadonlang u MLA ka Sohra Constituency u Bah Gavin M Mylliem, u President Farmer’s Front Meghalaya State Unit u Bah Himalaya M Shangpliang, u Secretary Farmers Front Meghalaya State Unit u Bah Egenstar Kurkalang, u President NPYF East Khasi Hills District u Bah Khrawbok Sohkhlet lem kiwei de ki dkhot jong ka NPYF na ka State bad District.
U Bah Gavin haba ai jingkren ha kane ka sngi u la pynpaw ïa ka jingsngew kmen ba ka NPYF ka la ïoh ban pynskhem ïa ki nongïalam jong ka Farmer’s Front bad ka Youth Front Sohra, ha kajuh ka por u la kyntu ruh ba kin shimkhia ïa ka kam ba la bynshet ha ki.
Shuh-shuh u la ong ba ka Sorkar Jylla ha ka jingïalam ka NPP, ka la shim shibun ki sienjam ban kyntiew ïa ki khun samla khamtam ha ka liang ka kam rep kam riang da kaba ka la wanrah bunjait ki skhim, u la ong, “Ka Sorkar Jylla ka don shisha ka thong ban kyntiew ïa ka ïoh ka kot jong ki nongshong shnong ba ha kylleng sawdong ka Jylla.”
U Bah Gavin u la kyntu ruh ïa ki nongïalam ka Famer Front ba kin shim ïa ka bynta ban pynshai ïa ki jingtip haba ki skhim sha ki paid nongrep jong ka thaiñ, khnang ba ki skhim ba wanrah ka Sorkar ki long shisha ïa ka jingmyntoi ïa ki nongrep.
U Bah Himalaya haba ai jingkren ha kane ka sngi u la ai burom ïa u Symbud Myntri Rangbah ka Jylla u Bah Prestone Tynsong u ba long u State President ba la ailad ban don la ka jong ka seng ka ban peit kyrpang tang ïa ki nongrep bad u la ai jingïaroh ïa ka Party NPP, ba ka don ïa ka Farmer Front bad dei tang kane ka party kaba don ïa ka thong ban sngap ïa ki jingeh ki nongrep kumjuh ban ïarap ïa ki nongrep.
