Shillong, Rymphang 01
Ka kaiphod halor ki shnong hapoh ka thaiñ Block I la dep ban pynkhreh hynrei ym pat lah ban aiti sha ka Sorkar Jylla namar ka ilekshon ha Assam, ong u Symbud Myntri Rangbah ka Jylla u Bah Sniawbhalang Dhar.
“Ngi la dep ban pynbit pynbiang ïa ka kaiphod hynrei ngim pat lah ban aiti sha ka Sorkar Jylla. Ngin sa peit. Hadien ba la thaw ïa ka Sorkar ba thymmai ha Assam, ngin sa shim ïa ka rai,” la ong u Bah Sniawbhalang, da kaba kdew ruh ka regional committee ka dang ap kaei ka ban mih hadien ka ilekshon ha Assam.
U Bah Sniawbhalang Dhar, uba dei u Chairman jong ka West Jaiñtia Hills District Regional Committee, u la bynrap, “Na ka liang jong ngi, kajuh ka regional committee kan ïai neh katba na ki, nga sngew ba kin sa shim ïa ka rai hadien ba la thaw ïa ka Sorkar kaba thymmai ha Assam.”
U la pynpaw ïa ka jingsngewskhem ba ka bynta kaba ar jong ka jingkren pynbeit pud ban pynkut noh ïa ka jingïakajia pud ha ki hynriew tylli ki jaka, kan sa sdang hadien ka ilekshon ha Assam.
