Shillong, Rynphang 01
U MLA ka Bharatiya Janata Party (BJP) na Pynthorumkhrah Constituency u Bah AL Hek u la pynpaw ba la dei ban bsuh shuh sa khyndiat ki kyndon hapoh jong ka Meghalaya Residents Safety & Security Act (MRSSA) ban kham ai bor ïa ki Dorbar Shnong.
Haba kren sha ki nongthoh khubor u Bah Hek u la ong ba la dei ban kham ai bor ïa ki Dorbar Shnong khnang ba kin lah ban trei kham bha bad ba kin shim kyrteng ïa kiba wansah ha Homestay, ki Hotel lane kiba wan sahwai kiba ha kino-kino ki shnong. U la ong ba dei ban pynrung kyrteng beit ïa ki ba wan nabar la ka dei ba ki wan sah shi bnai, ar bnai ne shi snem ruh naduh ka sngi ba ki wan nyngkong dei ban pynrung kyrteng ha ka Dorbar shnong bad ka dei ban long salonsar ïa baroh.
Shuh-shuh u la ong ba, haba don kiba wan ban sahwai ne ban rung shnong ha kano kano ka shnong kaba hap hapoh ka Jylla Meghalaya, ki nongwan sah ki dei beit ban pynrung kyrteng ha ka Dorbar Shnong kumjuh ruh ban pyntip ruh sha ka Police Station kaba jan tam jong kata ka shnong.
U Bah Hek u la ban jur ba ka MRSSA ka dei ban treikam ha baroh kawei ka Jylla, khamtam eh ha ki jaka khappud, namar ki briew kiba don ka jingmut ban wan buhai shnong hapoh ka Jylla ki lah ban wan ha ka dur kum ki nongbylla sngi, ki nongtrei ha ki karkhana, ki nongkhaïi ki rung lyngba ki border bad ki pynkylla long ïa ka Jylla kum ka ktem kaba lah ban long ruh ka jingma ïa ka Jylla.
Namar kata ka MRSSA, ka dei ban treikam ha sor bad ha ki nongkyndong, ka long kaba kongsan ban pyntreikam ha ki shnong bad ki thaiñ nongkyndong khamtam ha ki jaka khappud khnang ban lah ban tehlakam ïa ka jingwan ki briew ba nabar.
