Shillong’ Rymphang 01
U Fr. Anugrah Kerketta u ba dei peit ïa ka RRTC Umran Niangbyrnai ha ka sngi Thohdieng u la kyrkhu kyrdoh ïa ka Kripa Victoria Gardens of Rememberence kaba dei ka bynta jong ka Kripa Senior Citizen Home.
Ka Kripa Senior Citizen Home ka don ha ka shnong Nongsder Ri-Bhoi bad ka dei ka jaka ba ri ïa ki riew tymmen kiba ym don shuh ki nongri nongsumar, ka Kong Victoria Wallang ka trai ba pynïaid ïa ka Kripa Senior Citizen Home, ka la pynpaw ba ka la thied jaka sa khyndiat kaba don kham pajih na ka bynta ban pynlong lum jingtep kaba la ai kyrteng Kripa Victoria Gardens of Rememberence.
Katkum ka jingïathuh ka Kong Victoria Wallang ka la ong ba ha katei ka jaka ri tymmen ki don kiba wan sah ba nabar ka Jylla kumjuh ruh nabar ka Ri, namar kata ka la thied ïa katei ka jaka ban pynlong kum u lum jingtep namarba ki don kiba ym don shuh ki bahaïing hasem ne ki khun ki kti ban wan shimti haba ki la khlad bad ha kum kita ki khep yn sa pyndonkam ïa une u lum jingtep.
Kum ban shu kdew la plie ïa ka Kripa Senior Citizen Home ha u snem 2022 da ka jingthmu ban ai ka jingshakri ïa ki riew tymmen kiba ym don shuh ki nongri nongsumar. Haduh mynta ki don 17 ngut ki riewtymmen ki ba sah ha kane ka jaka ri tymmen.
