Shillong, Rymphang 01
U MLA ka North Shillong Konstitwensi, u Bah Adelbert Nongrum u la ong ba ha kane ka dorbar ka ban sa sdang shen, ngan sa rah bad kren nyngkong eh ha kaba ïadei bad ka Reservation Policy kaba ktah nyngkong eh ïa ki khun samla hapoh ka jylla.
“Ym tang ka wad kam wad jam hynrei kaba dei khamtam eh ki jingpule ne ki Academic” u la ong.
Kumta u la kyrpad sha ki paidbah ka Jylla ba kin buh lem ha ki jingduwai khnang ba yn lah ban pynbeit ïa kane ka bynta ba kongsan bha.
“Ngin nym lah shuh ban pynkohnguh ïa ki khun samla bad ban pynngeit ïa ki ha kata ka kam Sorkar hynrei ngi la donkam ban ïeng ha la ki jong ki kjat ban long ka jingshaniah halade, ban pynmih kam bad ban ai kam ai jam lem ïa kiwei pat” la ong u Bah Adelbert.
U Bah Adelbert u la pynpaw ruh ka jingsngewsarong ïa ka konstitwensi baroh kawei ba ki khlem pynkit ram bad u ong ba nga sngew dam ram kit ram namar ka jingaiti jong ki kaba nga la pyrshang haduh mynta ba nym buh ïa ka shuki hakhmat hynrei ban buh hakhmat eh ïa ka jaitbynriew namar ka long ka jingdonkam ban pynneh ban pynsah.
“Ngin nym lah ban kmen ha kita ki kyntien ka roi ka par. Lada ka hok jong ngi la shah knieh noh, ngi shah lute noh, kaei pat ka hok kaba ngin ai ha ka lawei ki longdien bad ki pateng ban wan,” la bynrap shuh shuh u Bah Adelbert.
