Amlarem, Lber 02
U Symbud Myntri Rangbah ka Jylla ba khmih ïa ka tnad PWD (Roads), Bah Prestone Tynsong ha ka 2 tarik Lber u la kular ban pyntrei ïa ka surok Amkoi-Shnongpdeng lada ki trai jaka ki ïatreilang.
Ïa kane u Bah Prestone Tynsong u la kular haba kren kum u kongsan ha ka tamasa Rongkusi ba la pynïaid da ka Dorbar Shnong Amkoi, kum shi bynta ka jingkynmaw burom ïa ki ‘riew rangbah kiba don bynta ha ka kam pynroi hapoh ka shnong ka thaw.
“Nga nud ban kular, lada phi pynïoh jaka namar kum kine ki projek kin ai jingmyntoi ym tang ïa ka pateng kaba mynta hynrei wat ïa ki pateng ban wan,” la ong u Bah Prestone Tynsong.
Haba ïadei bad ka dorkhast ba la aiti da ka Dorbar Shnong halor ban shimti noh da ka PWD ïa ka surok Nongbareh Lyntiar-Amkoi, u Bah Prestone u la bthah ïa ki ophisar ban pynbeit bad ka PWD.
U Myntri ka tnad pule-puthi bad MLA ka thaiñ, Bah Lahkmen Rymbui u la ban jur ba ka jingïatylli, ka jingïamap bad ka jingkitkhlieh lang ki long ki nongrim ba kongsan na ka bynta ban kiew shaphrang.
U la khot ïa ki nongshong shnong ban pynneh ïa ka jingïasngewthuh jingmut bad ka jingïatreilang ban pyntikna ba ki jingthmu pynroi kin long kiba jop.
U Bah Lahkmen u la kren halor ki jingpyrshang jong ka Sorkar ban pynsuk ïa ka jingïoh ïa ki skhim lyngba ki lad ‘online’, kaba pynlah ïa ki samla wat ha ki shnong ba jngai ban aplai.
U la pynshlur ïa ki samla pule ban bteng ïa ka jingpule da ka jingsngewskhem bad ban shim kabu ïa ki skhim ai jinghikai bad jingïarap pisa kiba thmu ban pynmyntoi sha ki.
Ha kane ka sngi, u Bah Prestone Tynsong u la plie paidbah ruh ïa ki maw sah jingkynmaw na ka bynta ka Kwui jong ka shnong Amngot (1966-1968), ka Madan Bol Amkoi (1980-1981), bad ka surok Amkoi-Nongbareh Lyntiar (2013-2014), ha ka jingdonlang ruh u MLA barim ka thaiñ, Bah Stephanson Mukhim, ka Vevotolu Kezo, SDO (Civil), Amlarem, nalor kiwei-kiwei.
Hadien ka jingïalang, ki khun samla ka shnong Amkoi ki la shim bynta ha ka jingshad Rong-Kusi, kaba dei ka jingshad kmen jong ki nong War Jaiñtia ban ainguh ïa U Blei Trai Kynrad halor ki jingkyrkhu ba u la theh sei kynthup naduh ka koit ka khiah, ka rep ka riang, ka kamai kajih, ka roi ka par nalor kiwei-kiwei.
Ha ka por mynsngi, la shim bynta ha ka jingshad pastieh tang da ki samla shynrang bad ynda la jan noh ka sngi la sdang mih madan sa ki samla kynthei ryngkat ka jingpyndait pisa ha ki tyrpeng jong ki nongshad.
