Shillong, Ïaïong 03
Ka jingïalang ha ka 02 tarik u Ïaïong, 2026, hapdeng ki kmie ki kpa kiba angnud ban ïoh phah skul ïa ki khun da ki bos MTC bad kiba dei na ka tnad Transport ha ka jinglam khmat u Bah Shakliar Warjri, MLA ka Mawthadraishan uba dei u Chairman, ha ka Secretariat, ka la pynsngewtynnad ïa ki kmie ki kpa na ka rai ka tnad ban phah sdang kit khynnah skul biang da ki bos MTC ha kylleng ka nongbah ym da ki bos STEMS.
Haba kren sha ki lad pathai khubor, ka Kong Sony Kharjana, ka la ong ba ka jingïalang ka long kaba seisoh ha kaba na ka liang u Chairman u la kular ba yn pynïaid biang ïa ki bos MTC naduh ka 7 tarik u Ïaïong, 2026.
Ka la ong ruh ba watla kim pat ïoh da ka jingthoh hynrei u Chairman u la ong don jingshaniah bad lada kam urlong, ki kmie ki kpa ki lah ban wan ïalam ïa la ki khun hakhmat ka khyrdop ka Secretariat.
U Chairman u la pynthikna ruh ba ka dor jong ka bos MTC ka ïapher shibun bad ka dor jong ka STEMS, bad kane ka ïarap shibun eh khamtam ïa kiba duk ba suk. Namar ym baroh kiba riewspah hynrei shibun kiba duk bad duna ha ka ïoh ka kot, la ong ka Kong Sony.
“Ngi la pyrshang ban pan da ka jingthoh na u Chairman namar ba ki kmie ki kpa kim shaniah shuh hynrei u la kular hakhmat ki kmie ki kpa ba un pynurlong halor kane ka jingkwah jong ki. U Chairman u la kren shai ba ha ka sngi Nyngkong lada jia ba ka bos kam wan shaw ïa ki khynnah skul, ki kmie ki kpa kin sa wan ïalam ïa ki khun ki kti baroh sha Secretariat,” la bynrap ka Kong Sony.
