New Delhi, ïaïong:
Kumba la pynbna, la ong ba kam shym don satia ka jingpyllait na ka bynta ki paidbah ka West Bengal kiba la shah weng kyrteng na ka thup ki nongthep vote, namar ba ka Supreme Court ha ka lah sngi U Blei ka la kyntait ban ai ïa ka hok thep vote shipor ïa kito kiba la shah weng na ka thup kyrteng ha ka por jong ka jingpyntreikam ïa ka Special Intensive Revision (SIR) bad kiba ki jingujor jong ki ki dang sahteng, da kaba ong ba kam lah ban ailad ïa ki ban thep vote ha ka elekshon Assembly ka ban sa wan.
Ka kynhun nongbishar kaba kynthup ïa u Chief Justice of India (CJI) u Surya Kant bad ka Justice Joymalya Bagchi ki la peitngor haba bishar ïa kiba bun ki jingkyrpad ban pynibor halor ka jingpyntreikam ïa ka SIR ha ka Jylla.
Ki nongmudui ki la kyntu ïa ka Kashari ban pynjlan ïa ka tarik ban pynsangeh ïa ki thup nongthep vote khnang ba kin ïoh ban ïashim bynta ha ka elekshon ban wan lada ha kaba kut la shah ïa ki jingujor jong ki. La pynsangeh ïa ki thup kyrteng ha ka 9 tarik, Ïaïong. Ki la kynthoh ba bun na ki, ki don ha ka thup kyrteng jong u snem 2002 bad ki don ïa ki kot ki sla kum ki Aadhaar card bad ki passport.
U CJI Kant u la peit bniah, “Kaei ka jingkylli ban ailad ïa ki ban thep vote? Lada ngi ailad ïa kane, kata ka mut ba ngin sangeh noh ïa ka hok thep vote jong ki briew kiba shah kynthup ha ka thup kyrteng ki nongthep vote,” la ïathuh ka tyllong khubor kumba la kren da u CJI Kant.
Ha kajuh ka por, ka Kashari ka la pynskhem ba ym lah ban shah ïa ki briew shimet kiba don ki mukotduma kiba dang sahteng ban thep vote.
