Lucknow, ïaïong:
Ka ïingbishar ba kyrpang jong ka National Investigation Agency (NIA) ha Lucknow ha ka lah sngi U Blei ka la rai pynrem ïa lai ngut ki briew da kaba set phatok shi jingim halor ka jingkynnoh ba ki la thmu ban pynbthei bom ha Uttar Pradesh halor ka jingbthah jong ka kynhun Ansar Ghazwat-ul-Hind, kaba ïatreilang bad ka kynhun lehnoh al-Qaeda ha India.
Kiba shah kynnoh ki dei kiba la tip kyrteng kum u Minhaz Ahmed bad u Maseeruddin ba la tip ruh kum u Mushir na Lucknow, bad u Tawheed Ahmad Shah na Jammu & Kashmir, la kem ïa ki da ki pulit ka Anti-Terrorist Squad (ATS) jong ka Uttar Pradesh ha u Naitung jong u snem 2021. Ki pulit ki la pynshisha ba ki la thmu ban pynbthei bom da ki riewkheiñduh ha ki jaka paidbah kiba don ha kylleng ka jylla.
Hadien kane la aiti noh sha ka kynhun National Investigation Agency ban pynlong ïa ka jingtohkit.
Ïa kine ki lai ngut la ïalam hakhmat ka ïingbishar hapoh ka jingpahara kaba jur ha ka por ba bishar ïa ki.
Katkum ka jingong jong u Special Public Prosecutor u Mithlesh Kumar Singh, ka ïingbishar ka la lap ba ki donkti halor ki jingkynnoh ba bun jait bad ka la rai pynrem ïa ki da kaba set phatok shi jingim ryngkat bad ka kuna. Ka ïingbishar ka la pynrem ïa ki ba ki la “pynlong, ne pyrshang ban pynlong thma pyrshah ïa ka sorkar India” bad lum tiar ïaleh da kum kata ka jingthmu.
La rai pynrem ruh ïa ki katkum ki kyndon jong ka Explosive Substances Act bad ka Unlawful Activities (Prevention) Act (UAPA). Ki kynhun tohkit ki la kylli bniah na ki 42 ngut ki nongsakhi, katba ki nongkyrshan ki la don san ngut.
U nongïasaid aiñ u Mohammad Shoaib u la ong ba kin tuklar ïa kane ka rai ha ka ïingbishar kaba kham halor.
Katkum ka jingpynngat, ka kynhun ATS ka la ïoh jingtip ba u Umar Halmandi, uba la shimti ïa ka kynhun al-Qaeda ha Indian Subcontinent hadien ka jingïap jong u Asim Umar ha u snem 2019, u dang pynrung bad pynlong ïa ki samla kiba leh pyrshah ha Lucknow.
La kynnoh ba u Halmandi, uba la ngeit ba u treikam na ka thaiñ khappud jong ka Pakistan-Afghanistan, u la bthah ïa kiba shah kynnoh, ba kin sdang ïa ki kam pyntriem ha India. Da kaba leh katkum kine ki jingbthah, la kynnoh ba ki lai ngut ki la kylla long shi bynta jong ka jingthmu kaba kham heh, ha kaba ka Lucknow ka dei ka thong ba kongsan jong ki, bad ki la thied ïa ki tiar ïaleh, ki tiar siat, bad ki tiar pynbthei.
Ha ka por ba la kem ïa ki, ki ATS ki la kam ba ki la ïoh kurup ïa ki tiar pynbthei beaiñ, ki tiar pynbthei, bad u Improvised Explosive Device (IED) ba la thep ha u Pressure Cooker na ki jaka sah jong u Minhaz bad u Maseeruddin.
Ha kane ka jingtohkit, ka kynhun NIA ka la lap ba u Minhaz uba ju trei shitom bha ha ki Social Media u la leit ïakynduh ïa u Tawheed Ahmad Shah.
La kynnoh ba kitei ki arngut ki ïakren man ka por, ha kaba u Shah u pynithuh ïa u Minhaz bad u Maseeruddin sha kiwei pat ki dkhot kiba ïadei bad katei ka kynhun.
