Shillong, Ïaïong 20
Hadien 12 sngi jong ka jingïakhih shong shah thngan da ki nongïalam ka Green-Tech Foundation (GTF) ha Madan Malki, ban pynbor ïa ka Sorkar Jylla ban wengnoh mardor ïa ka projek ha Lumpong-deng, na ka liang ka Sorkar Jylla ha ka janmiet jong ka 20 tarik Ïaïong, 2026, ka la hap ban sngap hakhmat ka Foundation bad ban pynduh noh ïa ka jingthmu wanrah projek ha dewlynnong Lumpong-deng.
Ka jingweng noh jong ka GTF ïa ka jingïakhih shong shah thngan, ka la long hadien ba na ka liang jong ka Sorkar ka la phah da ka jingthoh kaba la pynpoi sha ki nongïalam ha ka jaka shong shah thngan.
Ha ka jingpoi jong u Chairman ha ka jaka ïakhih, la pdiang burom da ki paidbah kiba la kyrshan ïa ka jingïakhih, ha ryngkat ka jingïadonlang ka Voice of the People Party, Youth Wing bad Women’s Wing, ki bahaïing hasem, nalor kiwei-kiwei de.
U Bah HB Nonglang u la mih da ka jingkmen na Woodland hospital ryngkat ka jingsynran lang ki nongïalam ban leit phai biang sha madan Malki hadien ba ka Sorkar Jylla ka la kohnguh bad phah da ka jingthoh halor ka jingdawa jong ki.
Ka jingshah thngan u Bah H Bansiewdor Nonglang ka la dap 12 sngi lynter. La bteng ïa ka jingshah thngan da u Secretary General u Bah Ritre Lyngdoh bad ka Kong Maryjones hadien ba ïa u Chairman la pynkit noh sha hospital ba la jur palat ka jingshitom ha ka met.
U Bah HB Nonglang haba kren hadien ba poi ha madan Malki u la ong, “Nga la shah thngan la 12 sngi lynter bad haduh 20 tylli ki drip la ai ha hospital bad mynta ka Sorkar ka la pyndem hakhmat ka Foundation bad khamtam hakhmat ki paidbah”.
“Naduh mynta ka sngi u Lumpongdeng un dei biang u jong phi, u jong nga bad un ïai long biang jong ka pateng ka ban dang wan,” u la ong.
U Bah HB Nonglang u la ainguh ïa U Blei nyngkong, ba ka jingshah thngan ba la 12 sngi ka seng ka la ïoh ïa ka jingjop bad ka Sorkar ka la pyndem. Kim pyndem ha ka GTF, kim pyndem hano-hano ruh hynrei ki pyndem hakhmat ki paidbah.
Namarkata, u la ong ruh ba ka jingïaleh naduh ka sngi kaba nyngkong kam dei ka jingïaleh jong ka GTF namar lada kan dei tang jong ka GTF, ki paidbah ki la dep bret khyndew mar lai kti ha u lum jingtep bad ngi la dep ïap. Da kaba kynthoh ba ki briew kiba shong ha Secretariat kim kheiñ bad kim tieng lada ki nongïalam ka GTF kin hap ban ïap ruh. Kumta ki la pyndem hakhmat ki paidbah.
U Bah HB Nonglang u la pynbna ruh ba ka jingïakhih da kaba shong shah thngan ha madan Malki ka GTF ka la wengnoh hadien ba ka Sorkar ka la kohnguh bad ai da ka jingthoh halor ka jingdawa ka GTF ban wengnoh. Lai sien lai wat u nongïalam ka GTF u la pyrta ‘ngi la jop’ halor ka jingdawa.
U Bah HB Nonglang u la ai khublei nyngkong ïa u Secretary General ka GTF u Bah Ritre uba la bteng ïa ka jingshah thngan bad kumjuh ruh ïa ka Kong Maryjones Myrsing kaba la shah thngan lang, ki sengbhalang kiba la ai ka jingkyrshan, ki kynhun ba ñiah kali na ki seng bapher-bapher, ki ‘riew shimet bad kiwei-kiwei de.
