Shillong, Ïaïong 21
Ka Hynñiewtrep Youth Council (HYC) ka la kynnoh ba dei ka jingtrei thurmur jong ka kompeni ba pyntrei ïa ka surokbah na Shillong-Pynursla-Dawki kaba la wanrah ïa ka jingïap briew khah-khah ha katei ka surok.
Haba ïadei bad ka jingkhlad noh jong ki ar ngut ki briew kaba la jia dangshen ha Mawlieh, u Bah Roykupar u la pynpaw ka jingsngewsih ba katba dangmih ki sngi ki briew ki la shu khlad na ka jingpyntrei ïa ka surok Shillong-Pynursla-Dawki.
Haba kren sha ki lad pathai khubor ha ka sngi Ba-ar jong ka taïew, u Bah Roykupar Synrem, President, u la ong “Ngi donkam ïa ka roi ka par ha ka Jylla bad ngi sngewkmen ba wan ki surok ba heh hynrei haba pyntrei ïa ka surok dei ban ïaid katkum ki kyndon ba la buh khnang ba kan nym don ka jingïap briew ha surok”.
“Naduh ba la sdang pyntrei ïa kane ka surok, ka jingïap briew ka la jur bha, ka jingaksiden kaba la wanrah ïa ka jingmynsaw bad jot ki kali bad ki riar ki tar. Ngi ïohi ba ki nongtrei bad ki nongpeit ïa katei ka surok kim shym la bud ryntih ïa ki kyndon ha ka por ba shna ïa ka surok,” la ong u Bah Roykupar Synrem.
U la ong ruh ba haba shna ïa ki surok dei ban pynthikna ba kan nym don ka jingjulor ïa ki tiar ki tar, kan nym don ka jingduh noh ne ka jingmynsaw jong ki briew kiba pyndonkam ïa katei ka surok, hynrei ka jingpyntrei ïa ka surok Shillong-Pynursla-Dawki kim bud ïa ki kyndon kaba la wanrah ïa ka jingïap ki briew.
Haba ïadei bad kane ka jingjia ïap ki briew ha katei ka surok, u Bah Roykupar Synrem u la ong “Ka HYC ka la phah da ka jingthoh sha ka High Court ban shimkam halor kane bad ban pynthikna ba ka jingïaid lyngba katei ka surok Shillong-Pynursla sha Dawki ka dei ban long kaba shngaiñ.
Ka HYC ka la thoh ruh sha ka HC jong ka Jylla ba ha ka por ba dangpyntrei ïa ka surok Shillong-Pynursla sha Dawki dei ban don ka jingïada, la ka long ka jingbuh ïa ki jingpynthaba ha ka por mynmiet, dei ban don ki pulit ki ban ap ha ki jaka ki bym long kiba shngaiñ bad kiwei kiwei de ki lad jingïada, u la ong.
Kumta u Bah Roykupar u la kyntu ïa ka HC ba kan shimkam halor kane, khnang ban pynthikna ba kan don ka jingïada ïa ki nongshong shnong bad ïa ki paidbah kiba pyndonkam ïa kane ka surok.
Haba kylli, u Bah Roykupar Synrem u la ong “Ka kompeni kaba pyntrei ïa katei ka surok Shillong sha Dawki kadei ba ki thurmur ba wat ha ka por ba ïaid ki kali ruh ki trei bad pynpra ïa katei ka surok kaba wanrah ïa ka jingmynsaw bad ïap ki briew, namar ki maw ki lah ban tyllun ha kano-kano ka por ruh.
