Shillong, Ïaïong 21
U Bah Ardent Miller Basaïawmoit, President ka Voice of the People Party (VPP) ha ka 21 tarik u Ïaïong, 2026, u la khot bad wer ïa ki paidbah ba kin wan ban ai ka jingkyrshan ha ka sngi Balang ka 22 tarik u Ïaïong, ha ka jingïalang paidbah ha Motphran ban dawa ïa kiba bun ki mat na ka Sorkar.
Kane ka jingïalang paidbah kan long ha ka por 2 baje nohphai sngi.
Haba kren sha ki lad pathai khubor, u Bah Ardent u la kyntu ïa ki nongshong shnong ba kin ïapoi ryntih sha katei ka jingïalang, ha kaba ka party ka la buh haduh 8 tylli ki mat ban dawa na ka Sorkar Jylla, kiba kynthup ïa ka mat ba ktah ïa ki khun samla, ki mat ba ktah ïa ki paradoh parasnam kiba shong ha ki jaka khappud, kiba ktah ïa u duk u rangli haba ïadei bad ka khyndew ka shyiap bad kiwei-kiwei ki mat.
Kumta u la kyntu ïa ki paidbah ba kin pyni ïa ka jingïa ryntih bad ïatylli ba kane ka khep ba mynta hi kin ïeng rangbah kum ka jaitbynriew ban pynurlong ïa ka jingangnud jong ki longdien ki mandien.
