Shillong, Ïaïong 22
Ka Hynñiewtrep Youth Council Sohïong Circle ha ka sngi Balang ka la leit ban pynsngew ïa ka jingkynduh jingeh ki paidbah nongshong shnong ka Wahnongskeh sha u Chief Engineer ka tnad Public Health Engineering (PHE) namar ka jingtrei torti ïa ka projek Jal Jeevan Mission (JJM) hapoh ka shnong.
U Bah Purning Shabong President ka HYC Sohïong Circle u la pynpaw ka jingsngewkhia haba ïadei ka projek sam um kaba la dep ban pyntrei naduh u snem 2023, hynrei haduh mynta ruh ym pat lah ban sam um tang namar ka jingbymlah ka tnad PHE ban tei ïa ka dam, u la ong ba “Kane ka la wanrah ka jingeh kaba khraw ïa ki paidbah nongshong shnong Wahnongkseh” kumta ka Seng ka la kyrpad ïa u CE ban wad ki lad ki lynti ban ïoh ban tei ïa ka dam hapoh ka shnong.
Shuh-shuh u la ïathuh ba ki la ïakren ruh haba ïadei ka jingeh ki paidbah nongshong shnong ka Laitnongkseh namar ka jingbym lah ban tei ïa ka top um, kaba la buh jingeh ïa ki paidbah tang namar ka daw ka jingpyrshah u khlieh nongshynshar, u la ong ba, “Baroh ki projek ki la ïaid naduh ka dam ki pipeline, hynrei tang ïa ka jaka pynlang um ym lah ban pyntrei, namar ba trei u briew u ba don jingïadei bad une briew ba pyrshah ïa kane ka projek.” Dei namar kata ka daw kane ka projek ka sahteng bad ka seng ka la kyrpad ïa u CE ban shimkhia ban pynkloi noh ka jingpyntrei ïa ka dam.
U Bah Purning u la pynpaw ba na ka liang u CE u la kular ban peit bniah bad ban shimkhia ha kaba ïadei ka projek ba hapoh ka shnong Wahnongkseh kumjuh ruh ka projek ba ha Laitnongkseh kaba u CE u la dep ban wan jurip ha ki por ba ladep.
