Nongpoh, Ïaïong 23
Da ki phew ngut ki paidbah kiba ju rep ju riang ha u Lum Wyrtoh uba dei hapoh ka jingkhmih jong ka Raid Nongpoh ki la pynpaw ïa ka jingbitar kaba jur pyrshah ïa ki nongïalam Raid halor ka jingkynnoh thombor pyrshah ïa ki mar rep ki jong ki ha utei u lum.
Kane ka dei ruh hadien ba ki nongïalam ka Raid ki la khot ïakren bad katto katne na ki nongrep hapoh ka ophis treikam ka Raid kaba don ha Sajer, Nongpoh, hynrei na ka liang ki nongrep ki la poi pynban da ki phew ngut ha katei ka jaka.
Hapdeng ka jingïakren, kala mih ruh ka jingïania kaba jur hapdeng ki nongrep bad ki nongïalam ka Raid halor katei ka jingkynnoh ba ka Raid, khlem da ai jingtip satia, kala shu pynjot ïa ki mar rep jong ki nongrep bad ruh ïa katto katne ki ïing kiba don ha utei u Lum Wyrtoh.
Kumban shu kdew hangne, u Lum Wyrtoh uba dei ruh ka jaka lehniam ba kyntang jong ka Raid Nongpoh manla u snem, ka Shad Sajer bad u dei ruh u Lum uba ka Raid ka dang ïaleh ban pynitynnad mynta da ka jingthung dieng bad kiwei kiwei de ki jingtei.
Uwei na ki nongrep uba la bitar halor katei ka jingkynnoh thombor ki nongïalam ka Raid u la ong, ba u la rep la riang ha katei ka jaka naduh ka por jong u kpa u jong u mynta da ki phew snem, hynrei ka Raid lyngba ki puh shilum, kala pynjot lut ïa ki jingthung jingtep ym tang ki jong u, hynrei bad jong kiwei ruh ki nongrep khlem da pyrkhat ne ai jingtip shwa ha ka por kaba biang.
U la ong ruh ba na ka liang ka jong ki nongrep, kin nym shong kli kti hynrei ba kin ïakhun beit ïa ka hok ka jong ki wat lada dei ban poi shaduh ïingbishar ruh ban ïoh ïa ka hok jong ki nongrep kiba la ngat ha katei ka jingkynnoh thombor da ki bor jong ka Raid.
