Shillong, Ïaïong 23
U Nongïalam ka BJP bad MLA jong ka Pynthor-umkhrah u Bah AL Hek ha ka sngi Palei u la ong ba ka seng ka dang bteng ban plie ïa ka jingkhang na ka bynta u Myntri Rangbah barim bad nongïalam ka TMC u Mukul Sangma, da kaba ong ba u Mukul u la pan por ban pyrkhat halor ka jingtyrwa ba la buh hakhmat jong u.
Haba kylli hato u Mukul u la kyntait ïa ka jingtyrwa jong ka BJP, u Bah AL Hek u la ong ha ki nongthoh khubor, “Haduh mynta um pat ong hooid ne em hynrei u la ong ban ai por ba un pyrkhat. Kumta, ngi la ai por ïa u ban pyrkhat.”
Shuh shuh haba kylli hato ka seng kan leit ïakynduh biang ïa u Mukul uba dei ruh u Nongïalam ka Liang Pyrshah, u Bah Hek u la ong, “Ngin bteng ban ïakynduh ïa u ha kano kano ka por. Kam don satia kano kano ka jingeh na ka bynta jong ngi, ka BJP.”
U la bynrap ruh ba ka BJP ka la dep ruh ban ïakren bad u Mukul ha u snem ba la leit ruh kumjuh.
“Ha u snem ba la lah, ngi la ïakren bad u hynrei u la ong ba un dang shim katto katne ka por ban pyrkhat. Ngi la ai ïa u, ïa ka por. Kan por kan sa wan, ai ba un pyrkhat shwa,” la ong u Bah Hek.
“Man ka por, ngin ïaleh beit ban ïakynduh ïa uno uno ruh, ym tang ïa u Mukul hynrei ki nongïalam na kiwei pat ki seng saiñpyrthei ki bapher-bapher. Ngin ïaleh ban ïakynduh ïa ki ruh kumjuh,” u la bynrap.
Shuh shuh na ka liang jong u Bah Hek u la ong, ba ki nongïalam na ki seng rilum bad ruh na ki seng rithor, ki la don lypa ha ka jingïakren bad ka BJP bad ha kaba ki la pynpaw ka jingkwah ban pynïasoh bad ka seng hashwa jong ka ilekshon MLA ha u snem 2028.
“Haduh mynta, ki la don saw ngut ki MLA ba mynta, kiba la don ha ka jingïakren bad nga,” u la ong ha kaba u la kyntait pat ban ïathuh ïa ka kyrteng ka jong ki lane ka seng kaba ki don.
“Ka jingkhang jong ka BJP ka long kaba plie. Lada ki wan katno katno ruh ngin pdiang beit sha ka ïing jong ngi,” u la bynrap.
