Shillong, Ïaïong 23
Watla kiba bun ki paidbah kiba poi da ki hajar ngut kim da tip ïa ka jingkyllon kynsan uwei u rangbah katba dang ïaid ka jingïalang ha Motphran hynrei kiba don marjan ki la rah noh ïa une u rangbah sha Robert Hospital kaba don ha Jaiaw.
Ki khubor ki ïathuh ba une u rangbah u la ïeng ha jaka ba bun bha ki paidbah hynrei haba la rah sha Robert Hospital haba ki doktor ki la ai jingsumar la pyntip ba u la khlad noh na kane ka pyrthei.
Une u rangbah la tip kyrteng kum u Bah Alos Nongpoh na ka shnong Byrsiej ha ka thaiñ Tyrso ha Ri Bhoi District bad la rah noh ïa ka met jong utei u rangbah ha katei hi ka miet ha ïingsah.
Kumban shu pynkynmaw, ki paidbah ki la poi da ki hajar ngut kiba la wan ban sngap ïa ka jingïalang ka VPP kaba la long mynhynnin ka sngi ka 22 tarik kaba la sdang ha ki por 2 baje janmiet tam eiei ha kaba u Bah Ardent Basaiawmoit uba dei u President u la pynshai ïa ki phra tylli ki mat ba ka seng ka buh jingdawa hakhmat ka Sorkar Jylla.
