New Delhi, ïaïong:
Ka kynhun National Investigation Agency (NIA), ka la ïathuh ha Delhi High Court, ba u nongïalam ka seng bhalang jong ka Kashmir, u Yasin Malik, u pyndonkam ïa ki jingïadei jong u bad ki nongïalam bahakhliehduh jong ka Pakistan, kynthup ïa u Myntri Rangbahduh bad President jong ka, ban pynphriang ïa ka mat halor ka jingthmu ban pynïakhlad ïa ka Valley.
Ka kynhun NIA jong ka ri ka la pynpaw ïa kine ki jingkynnoh ha ka jingkyrpad jong ka ban pan jingpynshitom ïa u Malik ba bun shah pynïap ha ki kti jong ka aiñ namar ba u la ai pisa halor ki kam lehnoh. Ka ïingbishar ba nyngkong ka la rai pynrem ïa u Malik da kaba set phatok shi jingim hadien ba u la kam ïa ka jingbakla jong u.
Ka kynhun NIA ka la pyrshah shuh shuh ïa ka jingkynthoh jong u ba katto katne ngut ki Myntri Rangbah ka India kiba la pyntreikam ïa u ban pynbeit ïa ka kam Kashmir, da kaba ong ba kam don jingïadei ei ei bad ka mukotduma pyrshah ïa u Malik bad kam pyllait ïa u na ki kam runar jong u.
Ka kynhun tohkit ka la pynshisha ba ka jingkam jong u Malik shaphang ka jingïajan bad katto katne ki riew saiñ pyrthei ba rangbah jong ka ri India, ki nongmihkhmat nabar ri, ki nongsynshar bad ki nongthoh khubor ki dei na ka bynta ban ïoh ïa ka jingshai bad ban ïoh ïa ka jingïahap jingmut.
“U Malik u la ïakynduh bad ki nongïalam bahakhliehduh jong ka Pakistan, kynthup ïa u Myntri Rangbahduh, u President, ki senator jong ka Pakistan Senate, bad ki Myntri Rangbah jong baroh ki Jylla, bad u la pyndonkam ïa kum kine ki jingïakynduh ban pynsaphriang ïa ki jingïathuhkhana pyrshah ïa ka India bad ban pynïaid shakhmat ïa ka jingthmu pynïakhlad ïa ka Jammu & Kashmir,” ong ka kynhun NIA ha HC.
Ka Affidavit ka la bynrap ruh ba tang ka jingkdew ïa ki riew saiñ pyrthei bad ki heh sorkar kam pynrem ïa ka jingshisha ba u Malik u don jingïadei bad ki lehnoh kum u Hafiz Saeed jong ka Lashkar-e-Taiba bad u Syed Salahuddin jong ka Hizbul Mujahideen.
Ka mukotduma kaba la buh kyrteng ban bishar hakhmat ka ïingbishar jong ki Justice Navin Chawla bad u Ravinder Dudeja, la pynsangeh noh sha u bnai Naitung hadien ba u Malik u la kam ba um shym la ïoh ïa ka jubab jong ka NIA.
U Malik uba dang ïasaid markhmat ïa ka mukotduma jong u, u la ïathuh kham mynshwa ha ka ïingbishar ba u la ïakynduh ïa u Saeed bad kiwei kiwei ki lehnoh ha u snem 2006 halor ka jingkyrpad jong u Special Director ka Intelligence Bureau (IB) ha kata ka por, u VK Joshi.
U la ong ba u Ajit Doval u la leit jngoh ïa u ha phatok ha basdang jong ki snem 2000 bad u la pynbna ïa ka khubor ba u la pyllait noh. Ka NIA ka la pyrshah ïa ka jingkynnoh jong u Malik, da kaba ong ba ki mat ki ïadei bad ki jingïakren shimet jong u nongshah kynnoh bad ki riew saiñ pyrthei ba rangbah bad kiwei kiwei ki jingïalang jong ka sorkar India, kiba don hapoh ka jingtip ba kyrpang jong u, bad “ki paw ba la pynmih tang ban ïoh ïa ka jingsngew ïahap jingmut jong ki paidbah.”
