Shillong, Ïaïong 23
Ka jingshah tuh jong ki kali arshaka ka la bteng na kawei ka sngi sha kawei pat nalor kiwei pat ki kam tuh kam thiem kiba dang ïai bteng bad ïa kane lah ban sakhi na ki jingjia shah tuh kiba dang shen na kylleng ki bynta jong ka sor Shillong bad na kiwei ki jaka ruh kumjuh.
Katkum ka khubor na ki pulit la ong ka Kong Annieta Kharpuri ka la ai ka jingujor ba ha ka 21 tarik mynta u bnai, ki runar bym lah ban ithuh ki la prong tuh hapoh ka dukan jong ka, kaba don ha ïew Mawlong, Ïewduh, Shillong bad ban tuh ïa ki mar dumasla (sikret bad pan masala) kiba shongdor haduh kumba T.70.400.
Ha kawei pat ka khubor u Bah Kevin Shirley Suchiang u la ai ka jingujor ba ha ka step jong ka 21 tarik mynta u bnai, kata ha ka por kumba 1.30 eiei, ki runar bym lah ban ithuh ki la tuh ïa ka arshaka jong u kaba don ïa u registration number ML05-AD-6644 na Mawkasiang, Shillong.
Ha kawei pat ka khubor, u Durga Skahi u la ai ka jingujor ba ha ka 21 tarik mynta u bnai, ha ka por kumba 8.30 mynstep, ki runar bym lah ban ithuh ki la tuh ïa ki ar tylli ki sati ksiar bad ka pisa haduh shi lak tyngka na ka ïingsah jong u, kaba don ha Dongkadiang, Nongmensong, Shillong.
Na ka liang jong u Tomason Khongbuh ruh u la ai ka jingujor ba ha ka 21 tarik mynta u bnai ha ka por 1 baje mynstep, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-S-3903 na ka jaka hajan jong ka Pongtung CHC (EKH).
Ha kawei pat ka khubor, ha ka 21 tarik mynta u bnai, ha ka por kumba 7.50 dang step, ki pulit ki la ïoh pdiang ïa ka jingpyntip ba ki runar bym lah ban ithuh, ki la prong tuh hapoh ka ïing jong u Khampher Naki Kharlukhi ha 6 Kilo kaba hap hapoh ka Kyrdemkulai OP (RB) bad ban tuh ïa kiba bun ki tiar ïing bad ka pisa T.3000.
Na ka liang jong u Priyanku Choudhury u la ai ka jingujor ba ha ka 21 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number AS14-Q-2150 na ka thaiñ Umsli, Bhoirymbong kaba hap hapoh ka Umroi PIC (RB).
Kumjuh ruh na ka liang jong ka Anika Rabha ka la ai ka jingujor ba ha ka 19 tarik mynta u bnai, ha ka por kumba 9.30 mynmiet, ka la lap ba ki runar bym lah ban ithuh ki la prong tuh hapoh ka ïing jong ka, kaba don ha Tura (WGH) bad ban tuh ïa ka ksiar bad ka pisa kaba long T.70 hajar.
