Shillong, Ïaïong 24
U Myntri ka tnad pule-puthi ka Sorkar Jylla, Bah Lahkmen Rymbui ha ka Thohdieng u la kynthoh pyrshah ïa u President ka Voice of the People Party (VPP), Bah Ardent Miller Basaïawmoit halor ka jingkynnoh ba ka Sorkar Jylla ka pynshitom beiñ ïa ki nonghikai da kaba bthah ïa ki ban pyndep ïa ka Meghalaya Teacher Eligibility Test (MTET), namar um sngewthuh ïa ka jingshisha.
“Ka jingkren jong u kaba kynnoh ba ngi pyndik ïa ki nonghikai da kaba ong ïa ki ban pyndep ïa ka MTET, ka long kaba dei ban pynrem jur namarba um sngewthuh kaei ka jingshisha. Hashuwa ba un kynnoh kum kine, nga sngew ba u dei ban wad shuwa ïa ka daw kaba don sha lyndet kum kane ka rai,” la ong u Bah Rymbui haba kren sha ki nongthoh khubor.
U Bah Lahkmen u la ong ba ïa ka Test Eligibility Test (TET) ka dei ka jingbthah ïa baroh katkum ka ‘Right of Children to Free and Compulsory Education Act 2009’ kaba la pynskhem ïa ka da ka rai jong ka Ïingbishar ba hakhlieh duh ha ka 1 tarik u Nailur, 2025.
“Ka rai ka ong ‘baroh ki nonghikai ki dei ban ‘pass’ ïa ka TET, khlem da kheiñ ïa ka jingjrong jong ka jingshakri, lait noh tang kito kiba dang sah sa tang 5 snem ka jingshakri, kiba lait ban shim ïa ka TET. Hynrei ki duh noh ïa ka jingkiew kyrdan’,” u la ong.
U la ong mano ba ïalam bakla, mano ba pynshitom – kumta u la ban jur ba ka Sorkar ka shah teh ha ka aiñ.
“Ngi dei ban sngewthuh ba ngi shah synshar ha ka aiñ bad ngi hap ban bud ïa ka aiñ namar kane ka rai jong ka Supreme Court, kam treikam tang ha ka Jylla Meghalaya; ka treikam ha baroh kawei ka ri India,” u la ong bad bynrap ba tang ki jaka pule rit paid kiba lait kiba dang ap ban phah sha ka Bench kaba kham hajrong.
“Kumta ban ong ba ka Sorkar ka pyndik ïa ki nonghikai da kaba bthah ïa ki ban shim ïa ka MTET ka long kaba bakla haduh katta-katta namar ki nonghikai ki tip shai ïa kane,” u la ong.
U Myntri u la ong ba ka Jylla ka la mudui ïa ka jingbishar bniah ha ka Ïingbishar ba ha khlieh duh, kumjuh ruh kiwei ki Jylla bad ki seng jong ki nonghikai kum ka SSA Association.
“Ka Sorkar ruh, namarba ka sngewthuh bad kam lah ban klet ïa ka jingnoh synñiang jong ki nonghikai kiba la shakri da ki phew snem, ka la mudui ruh ïa ka jingujor ban bishar bniah bad kumba ka long mynta, ka rai jong ka Supreme Court jong ka 1 tarik u Nailur, 2025, ka dang neh,” u la ong.
Ban kyrshan ïa ki nonghikai ba dang trei, u la ong ba ka Sorkar kan pynlong ïa ka TET “ym duna ïa ka arsien, lada lah lai sien, shuwa ka 31 tarik u Naiwieng, 2027”.
U la bynrap ruh ba katba ki kyndon jong ka TET ki dawa ïa ka D.El.Ed bad 45% ha ka klas XII, ha kaba baroh ki nonghikai ba dang trei kiba lah ban ïakhun na ka bynta ka TET.
“Ban ong ba ka Sorkar ka pyndik ïa ki nonghikai ka long kaba bakla, nga kyrpad ïa ki nonghikai ba kim dei ban shah ïalam bakla ha kum kine ki briew ki bym sngewthuh bad kim sngewthuh ïa kaei kaba ka aiñ ka ong,” u la ong.
Shuh shuh u Bah Rymbui u la khot sngewbha ïa ka VPP ban ai jingmut kumno ban weng ïa kane ka jingkhanglad ha ka liang ka aiñ kaba don mynta namar lyngba ki jingai jingmut jong ki, bad kan kham bha shuh-shuh.
