New Delhi, ïaïong:
Ka Delhi High Court, ka la hukum ban weng noh ïa baroh ki jingthoh ha ka Social Media, kiba pyni ïa ki durkhih ba la ring jong ki jingïaid bad jingpyntreikam ha kashari, ha kaba u Arvind Kejriwal, u ïasaid ïa ka aplikeshon jong u, kaba pan jingbit ban weng noh ïa ka Justice Swarana Kanta Sharma, ha ka mukotduma jong ka Excise.
Ka ïingbishar jong ki Justice V. Kameswar Rao bad u Manmeet P. S. Arora ki la pynmih ïa ka jingpynbna sha u Kejriwal, ki nongïalam ka AAP u Manish Sisodia bad u Sanjay Singh, u nongïalam ka seng Congress u Digvijay Singh bad kiwei kiwei halor ka PIL kaba pan ïa ka jingpynshitom ka bym ïahap halor ka jingkynnoh ba ki la Upload bad sam ïa ki sur ba la ring.
Ka kashari ka la bthah ïa ki ban ai jubab hapoh saw taïew bad ka la buh jingthoh ha ka thup halor kane ka kam ha ka 6 tarik u Naitung.
Ka kynhun nongbishar ka la pan jubab ruh na ka tnad sorkar pdeng jong ka sorkar pdeng, da kaba kdew ba la khang ban shon bad pynmih khlem jingbit ïa ki jingbishar jong ka ïingbishar katkum ki kyndon jong ka ïingbishar. “Ngi sngewkhia ïa ka jingmyntoi kaba kham heh jong ka jaka pule. Lym kumta, lada ngim lah ban tehlakam ïa kane, kan sa ïaid beit,” la ong ka kynhun nongbishar.
Ka kashari ka la bthah ïa ki Social Media ba kin shim noh ïa ki durkhih jong ka jingbishar kaba la long ha ka 13 tarik u Ïaïong.
U nongïasaid aiñ jong ka Meta Platforms bad ka Google u la ong ba ïa ki Link ba la buh dak la weng noh. Da kaba kdew ba ki don ki durkhih kiba dang don ha ka rynsan X, ka kynhun nongbishar ka la hukum ban weng noh mardor ynda la pyntip.
Ka la ailad ruh ïa u nongujor ban leit sha ki nongïasaid aiñ jong ka platform ha kaba ïadei bad kino kino ki Clip ba la pyndap, kiba hadien yn sa weng noh. Ha ka jingbishar, u nongïasaid aiñ jong ka Meta u la ong ba ka kompeni, kum ka nongpynïasuk, kam trei kum ka “nongpeit bniah” ne ka jingpeit bniah ïa ki jingthoh, hynrei ka leh haba la pyntip katkum ka aiñ.
“Ha ka khyllipmat ba ngi la tip, ngi shim noh ïa ka”, la ong u nongïasaid aiñ. Ka kashari ka la pan ruh na ki rynsan ban pynpaw lada ka lah ban ithuh mano ba dei u briew uba nyngkong eh ban buh ïa ki durkhih ba la kdew. U nongïasaid aiñ jong ka Meta u la ong ba namar ba la ithuh ïa ki Account jong ki nongpynrung kyrteng, ki lah ban pynbiang ïa ki jingtip jong ki nongpynrung kyrteng.
U nongïasaid aiñ jong u nongmudui u la pynpaw ba ka jingpynrung bad jingsam khlem jingbit ïa ki jingthoh jong ka ïingbishar ha ki Social Media ka pynthut ïa ka jinglong laitluid jong ka tnad bishar bad ka long kaba be-aiñ.
