Shillong, Ïaïong 26
U President ka Voice of the People Party (VPP), Bah Ardent Miller Basaïawmoit ha ka Sngi Saitjaiñ u la ther tyngeh ïa u Myntri ka tnad pule-puthi, u Bah Lahkmen Rymbui halor ka Meghalaya Teacher Eligibility Test (MTET), da kaba kynnoh ba ka Sorkar MDA ka da jied ban pyntreikam ïa ki hukum jong ka ‘Supreme Court’.
Haba kynthoh halor ka jingkren ba dang shen jong u Bah Rymbui, u Bah Basaïawmoit u la ong, “Nga kwah ban ong ïa u Myntri ka tnad pule-puthi uba la ong ïa nga ba nga dei ban law noh ïa ki ïitkhmat ïong jong nga khnang ban ïohi bha ïa ka hukum jong ka Supreme Court. Hynrei ngan ym phah law ïa kito ki ïitkhmat ba lieh jong i (Bah Lahkmen), ïoh im poi lynti shuh sha Secretariat.”
Da kaba khot ïa ka rukom treikam jong ka Sorkar “kaba sammut”, u heh ka VPP u la ong, “Ka long kaba sammut ba ki Myntri ka MDA ki kdew sha ka hukum jong ka Ïingbishar ba ha khlieh duh tang haba ïadei bad ka jingai jinghikai ne ki ‘Test’ na ka bynta ka MTET ban pyntikna ba phin long ki nonghikai kiba tbit.”
“Kaei kaba phylla ka long ba balei ba tang ïa ki nonghikai ban pyntreikam noh mardor ïa ka, katba ki don bun ki rai – ka ‘Supreme Court’ ka pynmih hukum ba tang ki katto-katne kiba lah ban pyndonkam ïit-ïong, hynrei hangne, kito kiba don jingïadei bad ka Sorkar MDA ki ïa tah ïit-ïong. Balei pat ïa kata phim pyntreikam hok?” u la kylli.
Haba ïadei bad ka jingtih dewïong be-aiñ, u Bah Basaïawmoit u la ong, “Ka Ïingbishar ka la khang pyrshah ïa ka jingkhaïi bad jingtih dewïong be-aiñ, kim pynsngap, hynrei ki briew jong ki, ki khaïi bad tih dewïong be-aiñ, bad dei tad ynda ki briew ki la ïap myn ha kane na ka jingbthei bom ba ki sdang ban kyndit bynriew.”
U la kynnoh shuh-shuh ba ka Sorkar kam pynleit jingmut ïa ki jingbthah jong ka Ïingbishar halor ka bha ka miat jong ki nonghikai.
“Nangta ka Ïingbishar ka la kren shaphang ka jingeh jong ki nonghikai, hynrei kim shym la leh eiei ïa kata,” u la ong.
“O, ban phah ïa ki nonghikai na bynta ka jingai jinghikai, ngim da kren eh tang ïa kata ka ‘Test’ ne ka eksam. Ngi ong, wat lehbeiñ ïa ki nonghikai. Sangeh noh ban phah kam ilekshon ïa ki nonghikai, sangeh noh ban phah kam lum khanasamari ïa ki nonghikai,” la bynrap u Bah Basaïawmoit.
“Phi ong ïa ki ban ïaleh eksamin, phi phah ïa ki ban leh ïa ka kam khanasamari, phi phah ïa na bynta ki kam ilekshon, bad mynta ha ryngkat ka tulop kaba rit, phi pynduh noh ïa ka ‘Deficit System’ ne ka rukom kaba kyrshan ïa ki nonghikai,” u la ong.
“Da ka tulop kaba rit kumne, mano ban kwah rung sha ka kam hikai? Kine ki briew ki don ka jingthmu kaba sniew ïa ka jaidbynriew jong ngi,” la kynnoh u President ka VPP.
U la buh jingkylli ruh ïa ka Sorkar halor ka jingpyrshang jong ka ban pynbun ïa ka jingdon jong kiba ‘pass’.
“Mynta ki phah ïa ki nonghikai na bynta ki ‘Test’, ban ai jinghikai, hynrei ynda la dei ban pynbeit (Correction) ïa ki eksamin ki ong, wat pyn ‘fail’ ïano-ïano, baroh ki dei ban ‘pass’. Balei ki kwah ba baroh kin ‘pass’? Namar ki kwah ban sngew sarong ha India ba bun kiba ‘pass’ ha kane ka Jylla jong ngi,” la ong u Bah Basaïawmoit.
“Kan myntoi aïu ban ‘pass’ lada ka jinglong-jingman kaba manbha kam lah ban pynnang-pynstad ïa ki khun jong ngi,” u la bynrap.
