Shillong, Ïaïong 27
Ka Meghalaya kan pyndonkam noh ïa ka ktien English, Khasi bad Garo kum ka Official Lang-uage hapoh ka Ordi-nance ba thymmai bad ka jingpyntreikam kan sdang naduh ka sngi ban sa pynmih jingpynbna da ka Sorkar Jylla.
Ïa ka Meghalaya Official Languages Ordi-nance, 2026 la pynmih ha ka Gazette of Megha-laya, Extraordinary ha ka sngi Nyngkong.
Ka jingpynbna ka tnad Law (B) ka ong ba u Lat u la pynbna ïa ka Ordinance ha ka 27 tarik Ïaïong, “haba pyntreikam ïa ka bor bala pynkup da ka clause (1) jong ka article 213 jong ka Riti Synshar ka Ri India”.
Kane ka sienjam kala wan ha ka por ba ka ïingdorbar thawaiñ kam pat shong dorbar satia.
“Naba, ka ïingdorbar thawaiñ jong ka Jylla Meghalaya kam pat shong dorbar bad u Lat u sngewhun ba don ka jingdawa ki kam kaba pynlong ïa u ban shim-khia mardor ban leh eiei halor kane,” ong ka jingpynbna.
Ka Ordinance, ka ban treikam ha baroh kawei ka Jylla Meghalaya, kan sdang ban treikam ha kata ka sngi kaba ka Sorkar ka buh, da ka jingpynbna ha ka Official Gazette.
Shisien ba la treikam, “Ka ktien English, Khasi bad Garo kin long noh ki Official Language ki ban pyndonkam ha baroh lane ha kano ka kam Sorkar jong ka Jylla Meghalaya,” ong ka kyndon ba 3 jong ka Ordinance.
Hynrei, ka English kan dang bat ïa la ka jong ka jaka ha kiba bun ki bynta ba kongsan. “Tangba ka ktien English kan ïai bteng ban pyndonkam ha baroh ki ïingkashari Civil bad Criminal ha ka Jylla,” ong ka Ordinance. Ki kam thaw aiñ ruh kin ïai bteng katkum ki aiñ bala don lypa. “Nalor kane, ka jingpynïaid ïa ki kam hapoh ka Meghalaya Legislative Assembly ruh kan long katkum ki kyndon jong ka Meghalaya State Legislature (Continuance of the English Language) Act, 1980.”
La ailad ïa ka Sorkar ba kan shim rai halor ka jingpyndonkam ïa ki ktien.
Ka Ordinance ka buh ruh ïa ki kyndon ban pyndonkam ïa ki ktien katkum ki thaiñ.
“Ka Sorkar ka lah ban buh ïa ka jingpyndonkam ïa ka ktien English bad Khasi ha ki ophis hapoh ki District, Sub-Division bad ki Block ha ka Khasi bad Jaiñtia Hills Division bad ka jingpyndonkam ïa ka ktien English bad Garo ha ki ophis jong ki District, Sub-Division bad ki Block ha Garo Hills Division”. Ka ktien English kan dang ïai long ka ktien pynïasoh hapdeng ki District.
Halor ka pule puthi, ka pynshai, “Ym don eiei ha kane ka Ordinance ka ban ktah ïa ka hok jong kino kino ki kynhun ba pyndonkam ïa la ka ktien haba ai jinghikai ha ki jaka pule kumba la buh da ka Riti Synshar ka Ri”.
Kane ka Ordinance ba thymmai ka pynduh noh ïa ka ain barim. Ïa ka “The Meghalaya State Language Act, 2025 (Meghalaya Act No.10 of 2005) la pynduh noh,” ong ka kyndon 7.
