New Delhi, ïaïong:
U heh nongïalam jong ka seng Congress u KC Venugopal u la kyntu ïa ka sorkar pdeng ban wanrah ïa ki aiñ kiba pyrkhing bha ban ïakhun pyrshah ïa ka jingma kaba nang jur kaba mih na ki digital lending apps kiba be-aiñ, da kaba kdew ïa ka jingkiew jong ki jingjia jong ka jingthok pisa, ka jingpynkheiñ ïa ki data bad ka cyber.
Ha ka shithi sha ka Myntri ka tnat pla tyngka jong ka sorkar pdeng ka Nirmala Sitharaman, ka General Secretary jong ka AICC ka la khot ïa ki kam runar kum ka jingdawa pisa, ka jingtuh ïa ki data bad ka jingpyndonkam bakla ïa ki online kiba ïadei bad kine ki apps ban kheiñ kum ki kam runar kiba shyrkhei ki bym lah ban ïoh jamin, ong ka kyrwoh khubor ba la pynmih.
U Venugopal u la tyrwa ruh ban thaw ïa ka Joint Task Force kaba kynthup ïa ki tnad pla tyngka, IT bad ki tnad ki kam pohïing ban pynpra ïa ki network jong ki nongpynïaid beaiñ bad khanglad ban pyntreikam ïa ki bank account jong ki.
U la ban jur ïa ka jingdonkam ban pynthikna ba ki Digital Lending Platforms kim dei ban shim ïa ka sut kaba palat ïa ki pud ba la buh da ka Reserve Bank of India, bad ai jingmut ban buh ïa ki kyndon kiba shai halor ka bai pyntreikam bad ka jinglut jingsep.
U nongïalam jong ka Congress u la dawa shuh shuh ban khang tyngeh ïa kum kine ki apps ban ïoh ïa ki jingtip ba kyrpang jong ki nongpyndonkam, kynthup ïa ki jingïakynduh bad ki jaka buh dur, bad u la khot ïa ki lad jingïada aiñ kiba kham khlaiñ pyrshah ïa ki rukom pynbor ban ïoh biang, ki jingbyrngem bad ki jingpynpoi khubor be-aiñ.
Da kaba pynpaw ïa ka jingdonkam ban pynbeit kloi ïa ki jingeh, u la ai jingmut ban thaw ïa ka helpline ne portal ba kyrpang na ka bynta ki jingujor.
U la tyrwa ruh ban pynlong kaba donkam ïa ki jingpan ram ban kynthup ïa u nongmihkhmat ne u nongkynduh kyrkieh ban pynbha ïa ka jingshai.
U Venugopal u la kyntu ïa ka sorkar ba kan bthah ïa ki kompeni tech ba kin buh kyrteng tang ïa ki app ai ram ba la mynjur da ka RBI ha ki platform kum ka Google Play Store bad Apple App Store, bad ai jingmut ban plie ïa ka platform ba thikna na ka bynta ki paidbah ban pynshisha ïa ki nongai ram ba la ai bor.
U la khot ruh ban kham pyrkhing ïa ki jingpynbna ba ïalam bakla ha ki Social Media bad ban khang ïa ki riew pawkhmat ban ai jingkyrshan ïa kum kine ki apps.
Haba pynpaw ba un sa rah ïa kane ka mat hapoh bad shabar jong ka Parliament, u Venugopal u la ban jur ïa ka jingdonkam ban leh kyrkieh, da kaba kdew sha ki khep jong ka jingshah lehbeiñ kaba jur bha kaba ïadei bad ki loan apps, kynthup ïa ki khubor jong ki jingpynïap ïalade bad ki briew shimet kiba leit rieh tngen ha Kerala bad kiwei kiwei ki jylla.
U la kdew ña ka jingjia jong u samla pule BDS u Nithin Raj na Anjarakkandi Dental College ha Kannur, ha kaba la ïathuh ba ka jingïap jong u, ka don jingïadei bad ki jing byrngem na ka loan app, ha ryngkat ki jingkynnoh ba u la leh beiñ ïa ka jaitbynriew ha ka jaka kaba u sah.
