Shillong, Jymmang 08
Ki nongthep vote jong ka Shillong Parlimentary Constituency kin dang bishar ïa ki ar ngut ki nonghikai ka skulbah North Eastern Hill University (NEHU) kine ki long u Dr.DRL Nonglait na ka seng NPP bad ïa u Dr.Batskhem Myrboh na ka seng VPP ha kane ka ilekshon MP Lok Sabha shiteng samoi ka ban sa pynbna noh shen da ka Election Commission jong ka ri India ban pyndap ïa ka jaka ba thylli hadien ka jingkhlad u Dr. Ricky Syngkon uba dei na ka seng VPP.
Haduh mynta ki seng saiñpyrthei kiba la dep pynbna sha ki paidbah ïa u kyrtong ban ïakhun ïa ka ilekshon MP Lok sabha ka dei tang ka VPP bad ka NPP.
Ka VPP ka dei ka seng kaba nyngkong ban pynbna ïa u kyrtong kata ïa u Dr. Batskhem Myrboh uba dei u nonghikai ha skulbah NEHU ha ka Political Science uba dei ruh u nongaiktien ka seng VPP, katba ka seng NPP kaba bat ïa ka bor synshar ïa ka Sorkar Jylla ka dang shu pynbna ïa ka kyrteng jong u Dr.DRL Nonglait kum u kyrtong ban ïakhun ïa kane ka ilekshon MP kaba la pynbna ha jingïalang ka General Executive Council NPP Khasi Jaiñtia Region kaba la long mynha ka 7 tarik mynta u bnai ha State Central Library Shillong.
Ki paidbah kin sa bishar mano ba kham biang na kine ki ar ngut ki nonghikai jong ka skulbah North Eastern Hill University namar u Dr.DRL Nonglait u dei u Professor ha ka subjek Khasi ha NEHU, u dei uba la pyndep ïa ka M.A. (Khasi), North-Eastern Hill University, Shillong,M.A. (Christian Studies), IDE, University of Madras, Chenai,M.Phil. (Khasi), North-Eastern Hill University, Shillong,PGDTE, Central Institute of English and Foreign Languages, Hyderabad,Ph.D. (Khasi), North-Eastern Hill University, Shillong. U Dr. Nonglait u la long u Principal, ka Mawsynram Border Area College, Mawsynram naduh u snem 1990 haduh 2000, u la long Principal, Sngap Syiem College, Mawkyrwat naduh 2000 haduh 2006, u dei u Professor ha Department of Khasi, NEHU, Shillong, naduh 2012 haduh mynta.
Katba u Dr. Batskhem Myrboh u dei u Associate Professor ka Deparment of Political Sciene ha NEHU, uba la pyndep ïa ka MA & Ph.D ïa ka Political Sciene na NEHU. U la long u Assistant Professor, Department of Political Science (Under-Graduate), Synod College naduh u 2007 haduh 2021. U la long u Associate Professor, Department of Political Science (Under-Graduate), Synod College naduh 2021 haduh 2023.
Katba kiwei ki seng saiñpyrthei kiba kham paw ha India kata ka BJP bad Congress ki dang ïa pynkhreh hynrei la sngewthuh kin sa pynbna ïa u kyrtong ha kine ki sngi, katba ki seng riewlum kum ka UDP bad HSPDP kiba don ha ka Sorkar kim pat pyni dak la kin pynieng kyrtong ne kin nym pynieng kyrtong hynrei ki paidbah kin sa shai ynda la pynbna ïa ka tarik thep vote. Ka jingpynbna ka seng VPP bad NPP ïa u kyrtong watla kim pat tip ïa ka tarik thep vote hynrei la sngewthuh ba kane ka long ban ailad ïa ki paidbah kin dang bishar ïa ka rynïeng ryniot, ka kyrdan pule, ka jinglong jingman jong u briew, ka nongrim ka seng saiñpyrthei khnang ba uno uno u MP lada u jop un long ka sur jong ki paidbah ka Jylla Meghalaya sha dorbar bah ha Parliament jong ka Ri India.
