Shillong, Jymmang 08
Ka Hynñiewtrep Integrated Territorial Organisation (HITO) ka la phah da ka jingthoh sha u Commissioner & Secretary ka tnad pule puthi haba ïadei ban pyllait noh mardor ïa ka bai bam (stipend) jong kiba leit pyntbit ha DIET jong ka Jylla Meghalaya.
Ha ka shithi ka HITO ka la kdew ba kane ka jingsahkut ka bai bam (stipend) jong kiba leit pyntbit ha DIET ka dei kaba la sah naduh u snem 2023-25 bad 2024-26 kaba la pynlong ïa ki ban don ha ka jingkhuslai jingmut ïa kiba bun.
Shuh-shuh la ong ba kane ka baibam (stipend) ba la pynmang ban ai sha kiba shah hikai ha DIET ka long kum ka jingkyrshan pisa ïa kiba shah hikai bad ba kin lah ban pyndap ïa ki jingdonkam ha ka jingpule jong ki kum ha kaba thied kot, thied tiar ba kynthup ka bai hostel, ka bai leit bai wan bad kiwei dei ki jingdonkam ba man ka sngi.
“Khlem kane ka jingïarap pisa, bun ki nongshah hikai ki shem jingeh ban pyndap pynbiang ïa ka jingdonkam, kaba pynlong ïa ki ban kynduh jingeh bad buh ïa ki ha ka jingkhuslai jingmut kaba jur.”
Ka HITO ka la ong ba kane ka jingpynslem kiba don ha ka bor ban pyllait ïa ka baibam (stipend) kiba shah hikai ha DIET ka pynduh jingkyrmen bad pynduh mynsiem shibun ïa ki, kumta ka HITO ka la kyntu ïa u Vijay Kumar Mantri, IAS ba un shimkhia ban tuklar lem, na ka bynta ban weng ïa kine ki jingeh. “Ngi kyrpad sngewbha ba phin pynthikna ban pyllait noh mardor ïa ki ‘stipend’ ba dang sahteng na ka bynta baroh ki nongpule DIET kiba la shah ktah ha baroh kawei ka Jylla Meghalaya.”
